السلام عليكم ..

أسعد الله أوقاتكم أعزائي بكل خير .. وأبارك لكم بالشهر الكريم .. وأعاننا الله واياكم على صيام وقيام ماتبقى منه

في الفترة الماضية غبت عن المدونة وعن الديره وعن البيت  وعن اليابسة بشكل كامل .. في الفتره الماضيه كان هناك مشروع جديد توه بادي وهالمشروع بحري .. وتم اختياري لتغطية هذا المشروع .. وقمت الموافقه بعد تردد بسيط مني ولكن بعد التفكير قبلت من باب الاستفاده وتجريب الجديد ..

قبل توجهي للبحر طلب مني  أخذ كورس خاص بالهاليكوبتر .. وبدون هالكورس ماراح اقدر اروح لوجهتي..و بعد بحثي عن الكورس علشان اعرف وش سالفته انصدمت وطقتني النفضه على خفيف .. وخصوصا اني ما اعرف اسبح .. ولكن الحمد لله حضرت الكورس والامور طلعت هينه وبسيطه على عكس ماوصفولي اللي خذوه قبلي .. والكورس للي حاب يطّلع عليه اسمه helicopter underwater escape training وبتلقون له مقاطع كثير في يوتيوب.
بعد اتامي للكورس جاء موعد الانتقال ..وودعت الأهل وتوجهت للمطار ومنه الى الهاليكوبتر والحمد لله تم الهبوط بسلام على البارجه .. في البدايه كنت شايل هم الشغله الجديده بسبب الأشياء اللي سمعتها من كثير من اللي جربو شغل البحر من قبل.. ولكن الحمد لله الأمور كانت تساهيل ومشت على مايرام .. بديت دوامي كمناوبه ليليه .. تبداء من الساعه العاشره مساء وتنتهي في العاشره صباحاً.. وعانيت في بداية الأمر لأنه استلزم مني اني اغير وقت نومي وهذا الشئ كان صعب جداً .. ففي أول يوم وصلت الساعه 9 صباحا الى البارجه .. واستمريت الى الساعه 12 الظهر وانا اقوم بعملية التسجيل ويعرفوني على المنطقه وطرق السلامه وبعض التوجيهات الإلزاميه اللي تقدم للشخص حال وصوله .. وبعد الانتهاء تم ابلاغي ان دوامي بيكون مسائي؟؟ طيب انا وش ينومني الحين؟ وايش اللي بيخليني اسهر الليل؟ لكن الحمد لله قزرتها على فلمين في الفتره النهاريه ونمت لي كم ساعه قبل الدوام بالغصب .. وبعدها بدا دوامي المسائي .. وفي الليله الأولى اظطريت اني اتعاطى جرعه اكبر من ماكسويل هاوس الكوفي الراقي والمشروب المفضل للعمده يوسف عمر .. والحمد لله ساعد على تصفية المزاج وعلى السهر الى الساعة العاشرة صباحاً.

واستمريت لمدة اسبوعين تقريبا بنفس البارجه .. الى ان تم نقلنا الى بارجه أخرى لأن البارجه الأولى غير مخصصه للمياه العميقه .. وفي البارجه الأخرى استقبلت رمضان واتميت فيها بقية الأيام.

في هذي الفتره مريت بمواقف واستفدت اشياء كثير .. سواء عن اللي حولي او عن نفسي انا شخصياً ..

خلونا ناخذها حبه حبه اذا ماوراكم شئ ..

• نظراً لأني السعودي الوحيد الموجود في البارجه فهذا يتطلب مني الاحتكاك والتكيه مع الجنسيات الأخرى .. طبعا لا يوجد بينهم عرب .. الا في الفتره الأولى كان معاي اثنين من الجنسيه المصريه بس ماكنت اشوفهم الا في المطعم اوقات الوجبات .. واختلاطي بهالجنسيات الغير عربيه لمدة طويله خلاني اعرف اشياء كثير عنهم و عن بعض طبايعهم وعن مدى تأثير الاعلام علينا برسم صورة عن بعض الجنسيات رغم إننا ماتعاملنا معاها.. ومن هالجنسيات كانت الجنسيه الصينيه ..وكانت هذي المرة الأولى اللي أتعامل معاهم عن قرب ولمدة طويله ومن تعاملي معهم اكتشفت انهم شعب عملي جداً وضحوك عكس ماكنت راسم في بالي انهم ثقيلين طينه.. ولكن طلعو ودودين وعمليين وروحهم طيبه وأنا أتكلم عن مايقارب الـ 40 صيني كانو على ظهر البارجه
• نظراً لأن الشركه القائمه بالمشروع شركة أمريكيه .. فالمهندسين والاداريين جميعهم من نفس الجنسيه الأمريكيه .. واعطو بعض الشغلات للمقاولين .. والعمال سواء اللحامين او الصباغين او المساعدين من الجنسيات الأخرى .. لكن كل الوظائف المسؤوله والاداريه امريكيه..يعني رئيس التحميل امريكي والمسؤول عن الراديو امريكي والمسؤول عن الدهان برضو امريكي .. والمقاولين اللي جايبهم ايضاً امريكان.. على الرغم من ان هذي الوظايف ليست وظايف كبيره لكنهم حرصو على ” أمركتها ” لأنها شركتهم وهم الباقيين .. ومفروض كذا تكون السعوده .. الحرص والنظر الى بعيد .. فالامريكان أمركو اي وظيفه عدله ورزو راعيها رغم انها عاديه جداً.
• الأمريكان من الشركة المشغله او البريطانيين اللي من الدوائر الأخرى .. أغلبهم كبير في السن .. وبدون مبالغه بعضهم طق السبعين .. من النوع اللي يفطر على فكس علشان يلين عظامه .. ورغم هذا لازال يشتغل .. والبعض يسمي هذا انجاز وحب للعمل .. لكن انا اشوف ان هذا موت للشخص رغم انه عايش!! هالشيبان اللي بينهم وبين القبر شبر .. يشتغلون في البحر طول السنه ويطلع لهم ثلاث شهور بالسنه اجازه وهم على هالشغله لهم سنين ..ولما كنت اسولف مع بعضهم .. اغلبهم بالاجازه حقته يكون اما في تايلند ولا بديره ثانيه يمارس الصياعه .. واغلبهم لا عيال ولا زوجه ولا أهل  .. واللي عنده عيال برضو مادرى عنهم وهم مادرو عنه .. وحمدت ربي على النعمه اللي حنا فيها .. عندنا الواحد اذا وصل الستين جلس وحوله عياله واحفاده .. وهذول حياتهم حياة حيوانيه ماغير أكل وشرب لا اهل ولا ناس .. وكل همه ملذاته. الترابط الأسري نعمه يفتقدها الكثير
• في البدايه كان الابتعاد عن الاهل والبيت والام والزوجه والاخوان شئ صعب جداً .. وتأثيره قوي .. وتحس بالخنقه والثقل .. وهالشئ بدا يخف مع الوقت .. ماهو لاني قليل خاتمه  ولكن مع مرور الوقت الامور تتغير والانسان يبدا يتعود .. وهالشئ يخلي الواحد مايخاف من المستقبل ومن البعد لانه راح يتعود عليه وهالشئ طبعا سلبي وايجابي .. وهالشغله خلتني اعرف كيف الناس اللي لهم سنين يشتغلون في الاماكن النائيه تعودو على الوضع .. وعلشان كذا المفروض الواحد مايطول الغيبه علشان لا يتعود واخرته مثل الشيبان اللي ذكرتهم بالنقطه السابقه.
• بعد ابتعادي عن الناس وفي اثناء الغياب اكتشفت اشياء في علاقاتي وبعض أصحابي .. البعض كنت اظن اني غالي عليه جداً .. ويفقدني ويحس بغيابي .. والبعض الآخر كنت أظن اني لا أعني له أي شئ .. سواء من الاصدقاء او من بعض اصحاب العمل .. ولكني لما جيت هنا اكتشفت اشياء غير .. اكتشفت ان بعض اللي كنت اعدهم اقرب من الاخوان لما درو بذهابي حتى مسج ما ارسل ولا سلم ولا نشد عن الحال.. والبعض اللي كنت احس اني ما اعني له شئ اغرقني بسؤاله عني وبتفقده لحالي ويحاول تصبيري والتهوين علي .. وهذا الشئ مايخليني احكم على احد طبعاً فلكل شخص أكيد عذرة.. ولكن يخليني اعرف ان الدنيا ماتتغير بغيابي ولا بوجودي الا عند اللي يغليني لوجه الله .. ماهو بقصد الوناسه والسوالف وبس .. والله لا يحرمني من اللي سألو عني وصبروني في ابتعادي
• بعض الروابط الأسريه لا تشعر بها وانت عايشها .. فنادراً ما تشعر بالشوق لأخيك الأكبر أو الأصغر .. او تحن لحظن امك او لمعانقة ابوك .. وهذا الشئ يعود لأنك عايش بينهم ومعهم .. ولكن بعد ابتعادي عنهم حسيت بقيمة الاشياء اللي كانت عندي وماكنت احس بطعمها .. وخصوصا في البارجه كان لا يوجد ارسال للجوال والتلفون الثابت ماهو دايم شغال(ثريا) وهذا الشئ زاد البعد والغربه واحساسي بالشوق لكل لحظه .. اشتقت لصباح الوالده وللجلسه مع والدي نتقهوى .. واشتقت لكل اخواني واشتفت لسوالفهم وجلستهم .. ولأول مره كنت أحس بألم بعدهم .. طبعاً ما أنسى الشوق للزوجه الغاليه .. والله لا يحرمني منكم ولا يريني فيكم مكروه .. ورساله لكل شخص بين أهله .. ترى ماهو لازم تغيب عنهم علشان تشتاق لهم او تعرف قيمتهم .
• رمضان هذي السنة هو أول رمضان يمر علي بعيد عن الأهل وعن الناس .. وكان جداً ثقيل وخالي من أي طعم .. لم أشعر بالجو الإيماني العام .. لم أشعر باحساس الفطور او السحور لأنه غالبا كنت افطر واتسحر في الغرفه .. افتقدت صلاة التراويح ولذة صلاة الجماعه .. أحسست بقيمة المسجد ونكهة صلاة الجماعه .. والحمد لله اني سوف أكون في العشر الأواخر متواجد على اليابسه .. والله يعيني على الصيام والقيام ..
• الأكل من ملذات الدنيا .. ورغم ان النظام المتبع هنا هو البوفيه المفتوح ثلاث مرات في اليوم .. الا انه من بعد رابع يوم بديت افقد الشهيه .. وذلك لأنه مافيه مثل اكل البيت .. وبعد دخول رمضان زادت المعاناه .. فلم أكن أتخيل رمضان بدون سمبوسة الوالده !!! كيف ؟ اظطريت اني اروح واقول للشيف الهندي .. يابن الحلال الحقني .. أبي سمبوسه .. وقلت بما انه هندي فاكيد انه هم اهلها .. ولكن صدمني انه قالي مايعرف للسمبوسه .. ولكن بحمد الله في ثالث يوم صيام لقيت السمبوسه موجوده في وقت الفطور .. وطلع اللي يسويها واحد ثاني غير الشيف .. صح انها ماهي نفس سمبوسة الوالده .. ولكن على الأقل تحس انك تفطر… واللي كنت أبي أوصل له في هذي النقطه إنه مافيه زي اكلنا الخليجي .. طعم ونكهة وبهارات وشغل عدل .. وانا من هنا أعلن توعدي للأكل الخليجي بكافة أنواعه .. جايك بالكبسه جايك
• بعد هذي التجربة البحربة .. استفدت ان الإنسان لا يصدق كل مايسمعه ولا ياخذ بوصف بعض الناس لأنه يبالغ ويخلي من الحبه قبه .. قبل لا اجي هنا سئلت عن عن ظروف العمل .. فرغم ماسمعته عن صعوبة العمل في البحر وحجم المسؤوليه كونك ممثل للشركه والقسم .. وغيره من الأمور الصعبه .. لكن بعد التجربه طلعت الأمور سهالات واسهل بكثير من عملنا على البر .. واكتشفت ان البعض يبالغ في بعض الأمور .. فلا تستفسر اشخاص عن شئ في مستقبلك .. فصعبهم يمكن يكون سهل عندك .. ولكن تخويفهم لك يمكن يخليك تغير قرارك .. إلا إن كان هالاشخاص اللي بتستفسر منهم اشخاص ايجابيين وناصحيين .. وابتعد عن المهوليين اللي يخلون من الحبه قبه

والمواضيع كثير في هالتجربه وأكثر من اني أذكرها كلها في تدوينه وحده ..

ولكن بشكل عام كانت تجربة جميلة واستفدت منها الكثير .. واشكر رئيسي في العمل اللي اقترح علي هالشئ .. لأنها أضافت لي الكثير .. واسئل الله ان ينفعني بها ..

في صباح الأربعاء القادم سيكون موعد رحلتي .. وبرجع اركب الهاليكوبتر وارجع لنفس المطار وأخذ سيارتي وارجع للبيت زي ما بديت ..

____________

وأحب أشكر كل من راسلني وسئل عن سبب غيابي عن المدونه .. والله لا يحرمني منكم