I B R A H I M

في الأمس كنت طالع مع الأهل الى شاليهات الهيلتون-الكويت

والجو كان ولا أروع .. والحمد لله غيرنا الجو وجددنا في الروتين حبتين كبار

والشاليهات الصراحه مرتبه وما عليها .. وبكتب عنها ان شاء الله اذا نزلت الصور ..

بس اللي يضيق الخلق الأشياء اللي شفناها من بعض الشباب

وأقصد بالشباب الجنسين الإناث والذكور

في نفس الشاليهات فيه كوفي ستار بوكس .. ومطعم بيتزا .. والجلسه خارجيه وحلوه

وكنت جالس أنا ونسيبي أبو سعود نتقهوى ونعين من الله خير

هالكلام كان العصريه وقريب المغرب

الى المغرب الوضع كان جيد

لكن بعد المغرب كانه فيه أحد فرك المصباح

طلعو لنا أشكال عجيبه غريبه وهللوو على الجلسه الخارجيه اللي كانت رايقه واللي كانت هاديه

شباب .. شعور واقفه .. والشنب ينطبق عليه نظرية Shanap Less

والحجان محدده والبشره تلمع والعطور حدث ولا حرج وطبعاً أنواع الإكسسوارات في اليد يا ربطه يا سلسال .. وطبعاً كلهم لهم نفس النظره .. مدري هل هذي النظره تدرس و أنا ما أدري … وهل هي عنوان للشاب الكوول هالنظره .. ما ادري

طبعاً هي عباره عن رفع حاجب وتنزيل الثاني والعين يسكرونها شوي كأنهم مركزين بشغله معينه

والجدير بالذكر ان الجميع لابس تيشيرت ماركة بولو … واغلبهم تقليد من مجاميعه

والبنات حدث ولا حرج … بنات يطبقون نظرية النعامه الخايفه .. مغطيه الراس والباقي اللهم لا اعتراض … أجسام مترهله .. ومع هذا لابسين استرتش … طيب مو لازم يا حجيه تلبسين مع الموضه … وش فيها العبايه؟ طيب لا تلبسين عبايه .. إلبسي شئ وسيع يا جنيفر أنستون … واستري هالشحوم

أو بنات جايين للكوفي وهم حدا الشغلتين … يا إنهم ناويين يروحون عرس بعد ما يطلعون من الكوفي … أو انهم  يشتغلون في سرك وطالعين بريك وبيرجعون

لأنهم حاطين كل ألوان الطيف بوجييهم … إشي اصفر واشي احمر واخضر و ووردي .. وهذيك ترسل ضحكة الهدد والثانيه ترد بضحكة الديك الرومي … والشباب يردون الصدا

جد كان منظر عجيب .. والأعجب منه انهم دخلو تقريباً بنفس اللحظه … وكأنهم متواعدين

وبدت النظرات بين فريق ” الكووول الشبابي ” .. وفريق ” واي منه البناتي”

وشئ يحير ياناس .. العيون والله تتلاقط .. لدرجة ان بعضهم يقدر يلف عينه 360 درجه .. وهذا النوع انا اسميه النوع اللي ” مسيطر على الوضع ”

يعني ما يخلي أحد يفلت من عيونه الجريئه

وطبعاً خويي أبو سعود ماهو مقصر .. بس أشغلته بالسوالف شوي

( ياحبي لك يابو سعود خخخخخخ )

خلصنا من وصف الحال

أدري ان الكل يحب يكون حلو ومرتب وملفت للإنتباه … لكن كل شئ له أصوله

لو جينا من ناحية الدين … فكل اللي شفته أبد أبد ما يجوز … وبالمذاهب كلها

ولو جينا من ناحية العرف والعادات … فأبد أبد لا هي من العادات ولا التقاليد العربيه مو الكويتيه والخليجيه بس .. ياناس والله حتى الأوربيين مايسوون هالسواة

ولو جينا من ناحية الذوق .. والله العظيم ( وعععع)

أنا من وجهة نظري ..

حلاة الرجال بشنبه … وملابسه ساترته وما تكون راصته كأنه عنده نقص بالقماش ..

والألوان تكون معقوله ومتناسقه .. يعني البنفسجي والفسفوري أبد ما تصلح

وماهو لازم الحواجب تتحدد وتلبس لي وردي وعنابي وتحط سلسال بيدك وتلبس تاج اختك علشان تثبت شعرك !!!

يعني لو جيت وقلت لك يا باشا انت جنس ثالث؟ بتزعل وبتقولي احترم نفسك شنو شايفني؟؟

طيب ليه ما تحترم نفسك من أساسها!!!

وانتي يابنت ترى فيه فرق بين الزينه وبين التعري

وترى فيه نوعيات من اللبس مايلبسونها الا بنات الليل ..

يعني اذا لبستي لبس هالشله وجاك واحد وقالك كلام نص كم مو تزعلين وتقولين له .. استح على وجهك

لأنه انتي بالاساس ما استحيتي … مع احترامي لك

وسؤالي هو .. وين أهلهم؟

الله يذكر أبوي بالخير … ياويله بالويل من يلبس كاب (كبوس) …

أذكر لبسه اخوي الصغير وتحسف الى يومك

وعنده نظريه ان هالكاب مايلبسه الا مدمنين مخدرات ( أخلصصصصصصص يابو عبدالله )

وعنده قوانين صارمه في اللبس وتمشي على الكبير والصغير

والوالده الله يطول بعمرها … اذا شافت على الواحد لبس مايناسبنا .. تقوله في وجهه

واخواني اذا شافو على عيالنا شئ ما يناسبهم بلغوهم وعلموهم الطريق الصح

بس اللي شفتهم أمس وين أهلهم؟ معقوله طالع هالباشا قدام أبوه وهو لابس هالتاج على راسه؟

معقوله هالبنت طالعه من البيت وقدام أمها وهي لابسه بدون لبس؟

دايم أقول الجيل السابق ابو الثوب والشماغ … والأم عباتها على راسها ولابسه بخنقها ولا برقعها

طلعو لنا جيل مشخلع ومبلتع

طيب هالجيل المشخلع وش بيطلع لنا؟

ياعزتي لك يالجيل الجاي

==========================================

طبعاً هذا لا يعني ان المكان سيئ .. بل بالعكس المكان حلو ومرتب …  وأنصح بزيارته

لكن هذا شئ أنا من زمان ودي اتكلم فيه

وهو انه لازم ننتبه لهالموضوع … واذا الظاهره زادت وكبرت

ترى ضررها بيمس الكل … فهالشباب والنبات هم زملاء أبنائنا وبناتنا وأخوانا في المدارس

وهذا الشئ قاعد ينتشر بشكل كبير … يمكن يكون في الكويت ملاحظ بشكل اكبر .. لأن عندهم حريه اكبر بكثير من عندنا بالسعوديه

ولكن عندنا بعد هالشباب ماهم مقصرين … هذا وهو ما عندنا حريه وعندنا شرطه وهيئه وهذا حالنا

واكبر دليل سافر وشوف السعوديات والسعوديين … وتعرف حالهم

الموقف يحتاج له وقفه …  ما أ قول تدخل حكومي

إلا أقول أهلي وشعبي

ودايم أقرا توقيع في الايميلات اللي توصلني من اخوي الكبير محمد ..

يقول ” إبني إبنك ولا تبني له ”

فدعونا نبني أبنائنا واخواننا

========================

أخترت لكم :

المتشبهين والمتشبهات

انتشار الفتنة