في تاريخ 24 يونيو 2008 يعني قبل سنه بالضبط .. كان وزيرنا المقدام القصيبي صاحب الفكره الذهبيه في السعوده السفليه .. كان قرسون
والسنه هذي وبنفس التاريخ .. طلع لنا بزي مقدم الطلبات وقدم الجبن والزيتون للمتسوقين ..
وكل هذا من أجل ان ينجح مشروعه في السعوده السفليه ..
طبعاً من يوم طلع لنا وزيرنا الموقر العنيد اللي بالغصب تنجح خططه .. ما سمعته ولا يوم تكلم عن الجنسيات الجنبيه اللي تشغل المناصب في الشركات الخاصه .. والمافيا اللي هي مسويتها من اعلى الشركه الى اسفلها وفي الأخير وعن العين والنفس سعودو الحارس والسواق ..
ما سمعناه يتكلم عن المهندسين العاطلين واللي يشتغلون بوظائف غير وظائفهم بسبب انشغال وظائف الهندسه بالهندي والباكستاني والفلبيني ..
ما قال لنا كيف بيقدر يعيش مقدم الطلبات في ديرتنا؟
ما ادري هل يعرف وزيرنا الموقر ان سعودة مثل هذي الوظائف الدونيه اللي راتبها ما يزيد عن 1500 ريال هو في صالح الشركات فقط .. منها محسوبه لهم سعوده .. وبنفس الوقت اوفر لهم من العامل الاجنبي اللي مكلفين باكله وشربه وسكنه واقامته وتجديد اقامته وتذاكر سفره .. بينما السعودي ماهم ملزومين يوفرون له هالاشياء ..
يا وزيرنا الموقر .. انا على استعداد كامل اني اشتغل زبال واخلي الابتسامه تملى وجهي .. اذا اني داري اني في آخر اليوم راح اركب سيارتي الالمانيه الفاخره وارجع لمكتبي في وزارتي .. وفي نهاية يومي برجع لقصري واشرب لي ذاك الفنجال بين عيالي اللي خدودهم ورديه من زود النعمه ومن زين الوظائف اللي هم فيها .. هذاك مدير شركه والثاني مهندس في اطلقها شركة و بنتي في احلى وظيفه واتخنها ..
فلبس مقدم الطلبات وجلستي ورا الكاشير يوم واحد ماهو ذاك الانجاز .. اذا قارناه بعدد العاطلين من اصحاب الكفاءات ..
ولو انك سائلني كان قلت لك ياليتك رجعت لنفس المطعم اللي صورت فيه العام وقلت لنا وش أخبار السعوديين اللي صورت معاهم العام .. وش اللي صار على حالهم .. وايش اللي تحسن وتغير في حياتهم .. وهالتصرف كان بيثبت لنا انك مهتم في مستقبل الشاب السعودي ..
لكن انا بالنسبه لي اعتبر اللي قاعد تسويه يا وزيرنا الموقر مجرد تمثيل على الشعب وخيانه لهم .. ومجرد محاوله فاشله من قبلكم لإنجاح مشروعكم في السعوده السفليه ..
سعادة الوزير نبيك تنزل للعالم وتسمع منهم وتعرف وش يعانون منه ..
وانت بتصرفاتك هذي تذكرني بسالفة اللي كان يشتكي من ضيق ثوبه للخياط .. والخياط يقوله بس وش رايك في لونه؟؟
وفي حالتك .. المواطن يشتكي من قل الوظايف ومن المافيا في الشركات وانت رايح وراجع على معلم الشاورما ومقدم الطلبات ..
سعادة الوزير ..
خططكم أنتجت لنا ..
سوق سوداء في فيز الاقامه ..
انتشار الرشوه في مكتب العمل ..
ارتفاع رواتب العماله ..
الكثير من المشاريع الصغيره اعلنت افلاسها ..
ارتفاع مستويات البطاله .. مما نتج عنه ارتفاع مستوى السرقه ..
وكالعاده أقول .. واللسته تطول ..
تدري يا سعادة الوزير .. اني تحسفت اني قريت جريدة الوطن اليوم .. لان الموضوع اللي فيه صورتك غثني .. وخصوصاً يوم قلت لي ان الموظف السعودي لا يهمه زيادة الراتب .. بل يهمه معرفة مستقبله ..
سعادة الوزير .. أكرهك وما ابي اصير صديقك 
(أدري إن الأغلاط الإملائيه مليون .. بس ماني مراجعها لأني مابي انغث من الكلام اللي كاتبه)
_______
تدوينه سابقة :
ترسل صورة من التدوينة لمعاليه بالبرق .. لأنه أحدث تقنية تتعامل بها الدوائر الحكومية ..
بالامس أثناء تواجدي في مكتبي حضرت الينا فتاة ابلغتنا انها ترغب في عمل وذلك لحاجتها المادية الماسه،تفاجأت أنها تحمل الماجستير في احد التخصصات النظرية لديها دورات مختلفة وبما أني اعمل في احد الجامعات توجهت بثقة إلى وكيلة الجامعة للشؤون الإدارية وكلي أمل ان يتم تعيينها محاضرة أو على الأقل معيدة حيث أني اسمع شكوى متكررة من وكيلات الاقسام عن وجود نقص في اعضاء هيئة التدريس مما يجبرهم على تكديس الطالبات في شعب قليلة ويصل عدد الطالبات احيانا 70 أو 80 في شعبة واحده(اعتقد أن هذا لا يحصل سوى في السعودية)
المهم بعد مداولات استمرت يومين صدر القرار السامي الكريم بإن يتم تعيينها ماذا تتوقع؟ والله اني اخجل من ذكر ذلك
تعييها مراسلة؟؟! نعم مراسلة لم أخطئ في كتابتها
وهل تتوقعه عمل رسمي بل مراسلة بديلةلفترة مؤقته عن مراسلة في اجازة امومة لمدة 5 اشهر وبراتب مقطوع 1800ريال
لاتتخيل مدى خجلي وأنا ابلغها بذلك،ولا تتخيل مدى غصتها وهي تقبل بالوظيفة لأنها في حاجة ماسة لأي مبلغ يساعد اسرتها المحدودة الدخل
عندها لم اتمكن من القول سوى حسبي الله ونعم الوكيل على من كان السبب
شكله اعجبه الشغل في المطاعم
صدقني الكلام سهل
لو كان في مكان أحد العاطلين مستحيل يرضى بوظيفة راتبها متدني
مجرد دعاية إعلامية
طيب ومين راح يصير صديق الوزير يا ابراهيم؟
ومين راح يحبه ؟
مسكين الوزير ما عنده أصدقاء .. يتفسح لوحده في زاوية المدرسة
والله حرام عليك .. راجع قرارك وحاول تصير صديقه لو بالنية..
< ما جازلي بالتدوينة الا جملة الكراهية وعدم مصادقة الوزير
انا ابغى اعرف بس وش يدري ذالمصوريين أن طويل العمر يشتغل في ذالمحل
يعني هو قبل مايروح للمحل بأسبوع بلّغ إدارة المحل علشان تنظفه وتلمعه
وبلّغ كل الجرايد علشان تجي وتصور وأنه طال عمره عادي عنده هالشغل ؟
كلنا منافقين بشكل أو بآخر
كل المجتمع كذا .. نرضى لأنفسنا مالانرضى لغيرنا وهكذا ..
أنا أقدر أقولك خطبة عصـماء عن شرف العمل والعمل الشريف وو بس لو بيكون لي الخيار ماراح أقبل بعمل أحس فيه تقليل من قيمتي
غازي تدري وش مشكلته؟
زي مشكلتي أناوغيري بس على أكبر شوي (مشكلة الانسان لما يستغني) .. يعني أنا مواطنة بسيطة لذلك أحلامي بسيطة بس غازي مواطن هامور من زمان وهو يآكل من حلال الدولة لذلك تضخمت عنده الأنا وصار يعتقد أنه إنسان من طين آخر وتراب مختلف..أو أنه من حقه يعيش بالنمط الفلاني لأنه يستحق أما غيره لا ..مايستحق !!
فصار يحس أن مفروض فئة الشعب الغلبان يشتغل كاشير ويشتغل قرسون
وش فيها؟ الشغل مو عيب .. هو يحس ان هالانسان القرسون مايحلم بشي أكثر من غرفتين سكن وسيارة ددسن مقرقعه ..وأكل يادوبك يكفيهم بهالشهر المهم يشتغل وبس ..والمهم يظف الشباب ويقلل نسبة البطالة لو كانت بزيادة نسبة الفقر !!
يعني يحل المشكلة بمشكلة ثانية عادي !
عندي زميلة من الفئة الي اياها ..أنا أعرف أن راتب سواقها مايقل عن ألفين ورواتب خدمها الي ببيتها مستحيل يقلون عن عشرين ألف شهرياً إذا كانت متواضعه وماعندها حاشية ضخمة .. مع ذلك كان تقول ليه المعلمات طماعات؟ راتب أربع خمس آلاف شي كويس مرة..يتعينون على مستوى ثالث وهو مفروض خامس عادي عادي !!!! ليه يطالبون بتعديل المستوى ومدري ايش !!
عادي ! أهم شي حاجة تعيشهم وانتهينا ..
هنا المشكلة ..مشكلة فئة تعتقد أن أقصى أمانيك العيش وبس ..
مو من حقك ترتاح ولا تنبسط ولا تعيش حياتك طول بعرض ..
أنت بس لازم تآكل عشان تعيش عشان تموت ..وبس !
عشان ما أكون عممت ياليت تعدل ردي تقول ” كثير من المجتمع كذاً…كثير من الناس منافقين ..”
بجد بجد المسرحية دي مكررة وبايخه
بإذن الله أجمعكم في يوم بكوفي شوب وتتصالحون ..
وأنا بأتنازل وأقدم لكم القهوة بنفسي!
أي خدمات ثانية؟
“يا وزيرنا الموقر .. انا على استعداد كامل اني اشتغل زبال واخلي الابتسامه تملى وجهي .. اذا اني داري اني في آخر اليوم راح اركب سيارتي الالمانيه الفاخره وارجع لمكتبي في وزارتي .. وفي نهاية يومي برجع لقصري واشرب لي ذاك الفنجال بين عيالي اللي خدودهم ورديه من زود النعمه ومن زين الوظائف اللي هم فيها .. هذاك مدير شركه والثاني مهندس في اطلقها شركة و بنتي في احلى وظيفه واتخنها ..”
عليك نووووووووووور
أنا نفسي يداوم أسبوع واحد بس في هذه الوظيفة
ساعتها راح يشوف له عقد عمل في الخارج مو بس يستقيل
شر البلية كا يضحك
ما أدري ليش يقطعون فيه العالم.
هو عنده وجهة نظر, وحلول يؤمن فيها يحاول يطبقها. وتبدو لي منطقية تماماً. اي تغيير بيكون فيه ألم, وهذا ما يعني ان التغيير خاطئ.
تقول لي المناصب في الشركات الخاصة؟ أقول لك انت قلتها, “خاصة”. الشركات هذي ملك أصحابها و هم يعينون من يشاؤون. تقدر الحكومة تفرض عليهم بعض الضوابط, لكن اذا كثرت الضوابط اما انها ما تطبق صح (و يصير تحايل), واما انها بتصير عنصر منفر لمؤسسي الشركات والمستثمرين. فيه طرفين لهالمسألة, ومن السهل على شخص في أحد الطرفين انه يتجاهل وجود او شرعية احتياجات الطرف ثاني.
تقول لي فيز؟ أقول لك خمس الدولة عمال أجانب وعندنا نسبة بطالة كبيرة. صرف العمالة أو جزء منها وبتنحل البطالة. معادلة نتيجتها مقاربة للصفر, لكن ما راح تنحل الا بشوي ألم.
ما أقول ان هالقرارات هي الأفضل لحل الأزمة. ما أعرف وش أحسن طريقة. وما فيه أحد يقدر يجزم ان فكرته هي الصحيحة. لكن قطعاً حلول الوزير تبدو منطقية. والمشكلة أكبر من أن يحلها شخص واحد, تعتمد على أفكار سائدة في المجتمع, على العمال, وعلى الشركات.
لوم شخص ظاهر الاجتهاد ما أعتقد يقربنا للحل. بالعكس, يخلي الشخص القادم أكثر تردداً في انه يحاول يسوي تغييرات كبيرة لأننا مجتمع يسارع باللوم حتى وان ما كان منطقي.
ابوخليل, لو كان هالموضوع تبيين لليه تعتقد أن السعودة السفلية خاطئة, وتوضح وتثبت اللي تشوفه الحل المناسب لكان أكثر فائدة لي أنا على الأقل.
وسلامتك حبيبنا
الله يخلي لنا سعادة الوزير ولايحرمنا منه..
أصلاً احنا مستانسين بالبطالة..
ههههههههه شي مخجل والله.. تصدق يا ابراهيم الهندي او الباكستاني اذا جا جديد من بلده مايلحق يجلس اسبوع
بدون عمل الا وتلاقي كل البهنود والباكستانيين يوفروا له الف وظيفه وتلاقيه يختار ايش اللي يناسبه منها.
صدقني يا ابراهيم المنطقه الشرقيه بعد خمس سنوات بالكثير ماراح تلقى لا سعودي ولا عربي في شركة وراح
تلقاها عباره عن منظمات تشغيله يفيدوا بعضهم و بس.. و الوزير جالس يبيع جبن و بطاطس
تحكيني زميلتي تقول ( ولد خالي سعودي وله قريب اجنبي فاتح محلات باسم خالي ومشغل جماعته، فتح محل جوالات وشغل ولد خالي السعودي فيها ويدفعله راتب كل شهر، الاجانب اللي معاه لهم نسب وارباح 000والله والسعوده ياوزير
(ولد اختي خريج كلية تقنية وله اربع سنوات يشتغل في شركة مشغله لموبايلي على راتب الفين ريال موقادر يتزوج ولا يفتح بيت والادهي والامر انهم يعرفوا كم دخل الشركة وكم بيودعوا في حساب الشركة خاصة انه فرع الشركة جنب الحرم المكي , وما في علاوة أوهدايا اعياد ولا اي شيء000 الله يكون في العون )ياوزيرنا الموقر طالب بالسعودة لكن اضمن للسعودين رواتب تناسب المستوى المعيشي ، مو خطط وشعارات وفي النهاية بلا فائدة 00
السعودة السفلية مو خطأ .. ممكن تكون صح لاعتبارات محددة
لو كانت بسقف رواتب أعلى .. لو كانت تضمن حياة كريمة للإنسـان
ترى الطيار (تاكسي) جو .. بس راتبه عالي ..
شف الفرق بين (تاكسي)الأرض و(تاكسي ) الجو
(الراتب) !
الله يعين
تدوينك عين العقل ليته بدال ما يسعود هالوظايف يحاول
يرفع رواتبها على الأقل يخليها ثلاثة ألاف ايش المشكلة و بعد انا اشوفها شوي
مقارنه بدخل البلد و الميزانية الكبيرة فلوس اللي تجي الوزارة وين تروح
أبي أعرف هالشيء بجد وين تروح
ادري انه يبي يسوي سعودة و يبي يختار الزين للشباب بس تفكيره غلط
اصبت مقتل
أخوي مبتعث عائد من أمريكا بشهادة ماجستير في الإدارة الصناعية بتقدير جيد جدا و عنده شهادات خبرة عمل بالسعودية و أمريكا، و تقدم للوظائف في الشركات منذ شهرين و لا أحد وظفه و المسوؤلين غير السعوديين يقابلونه و في عيونهم الشرر و و الأغلبية تقول ضع أوراقك أو سجل من موقعنا على الانترنت و لا تقابل احد، و يلف مثل الشحاذ.
و حتى الموظفين السعوديين يقابلونه بتأفف و قرف و حقد و احساس بأنهم لو وظفوه سيأخذ مكانه.
تحياتي الى كل من علق …
جهاد : مثل هالقرارت راح تلقى صدى طيب اذا انه كان معها قرارات أخرى للطرف الآخر من الراغبين بوظائف كريمه تغنيهم وتعطيهم ما يرغبون فيه من حياتهم كبشر من زواج وامتلاك منزل … وكلنا نعرف ان سعودة الوظائف المتدنية الدخل لا تعطي صاحبها حياه كريمه في بلدنا .. وسط غلاء المعيشه اللي البلد تعيشه و طبعاً هذا السبب في تدني الدخل يعود الى وزيرنا الموقر لأنه لا يجد حاجه في رفع الرواتب .. فعلى قولته الموظف السعودي يهمه انه يعرف المستقبل المهني في هذه الشركه فقط ..
وانا الوم القصيبي يا جهاد … لأنه وزير العمل السعودي .. لو هذا الموقف طالع مني او منك صدقني محد بيلومنا … لكن لما يكون الموضوع ان الوزير ماعنده اي شغله الا سعودة سوق الخضره والحلاقين وغيرها من هالوظايف …
تقولي انه ما يقدر يلزم الشركات على سعودة المناصب العاليه والوظائف الاخرى اللي رواتبها عاليه … مع انه بنفس الوقت قادر يجبرهم على السعوده في الوظائف الدونيه …
مافيه اشكال يحق لصاحب الشركه انه يوظف المدير اللي يبي … لكن أنا كوزير لازم اني آخذ الإجراءات اللي تجبره انه يوظف السعوديين .. ومنها …
أول حاجه ارفع رواتب الجنسيات الآسيويه … فالمهندس الهندي يبداء راتبه من 3 آلاف .. فمن غير المعقول ان صاحب الشركه بيحاول يجيب له سعودي براتب 8 آلاف … لكن لو خلينا رواتب الجنسيات الآسيويه تبداء من 8 آلاف ريال .. وبنفس الوقت نجبر صاحب الشركه اللي دخلها بالملايين انه يوظف السعودي وانه راح يكون له مميزات في حال حصوله على نسبه عاليه من السعوده فراح يكون له هالأمر محفز … لكن حنا كدوله نعطي الآسيويين روابت متدنيه ونقوله وظف سعودي بضعف راتبه اكيد ماراح يكون شئ منطقي ..
والاجبار وتعديل الرواتب يكون عن طريق تنصيف الشركات الى عدة تصنيفات ( أولى ثانيه ثالثه وهكذا ) وهذا بناء على دخل الشركه ورأس مالها ومجال عملها …
الشغله الثانيه ..
الشركات الكبيره امثال سابك وارامكو وشركات الحديد وسكيكو والبنوك وغيرها … وش قدمت للمواطن … هل يعقل بنك ارصدها بالمليارات عدد موظفينه ما يتجاوزون الخمسين ؟ والباقي معطيه لشركه خاصه كلها من العماله الهندي .. علشان يتملص من السعوده … وهذا الشئ ينطبق على باقي الشركات في توجهها لنظام العقود وسط خرق علني لأنظمة السعوده ..
ان كاننا بنقول كل شئ هذا شغل خاص ومالنا دخل وما نقدر نجبره على السعوده … فاما نوقف موضوع السعوده بالكامل او نطبقه على كل المستويات خصوصاً مع توفر الكفو السعودي ..
والحلول الأخرى هي الحلول الماليه والدعم الحكومي ..
في الكويت كمثال .. موظفين القطاع الخاص يجدون دعم من الحكومه في رواتبهم … يعني اللي يدخل البنك ويستلم راتب 400 دينار من البنك … الحكومه تعطيه فوقها 400 دينار وبكذا صار راتبه ازين راتب وما راح يقول ما ابي اشتغل في القطاع الخاص وابي اشتغل في الحكومه لان راتبه موازي لموظف الحكومه … غير انه اي زياده تجي في الرواتب لموظفين الحكومه تشمله .. لانه عندهم الزياده تعطى للمواطن وليس للموظف الحكومي .. وهذا يسمونه دعم العماله الوطنيه … والدعم يكون للمواطن الموظف ..
فالكل يا جهاد بيشتغل في الوظائف الخدميه لكن بشرط الراتب الكريم اللي يضمن العيشه الكريمه … فلو في موضوعنا هذا الحكومه تعطي قرض زواج وتوفير سكن وزياده في الراتب .. صدقني الكل بيطمح لمثل هذي الوظائف …
لكن مثل هذي الحلول يا جهاد وسعوده الوظائف الدونيه هي مجرد .. تقليل نسبة العطاله وزيادة نسبة الفقر ..
وفي الأخير ان كان مثل هالامور الوزير ما يقدر يسويها .. ولا هي في صلاحياته او انه محارب ومحجم السلطه … فيجب عليه ان يستقيل من منصبه ..
و الحديث يطول .. يا حبيبنا
ولكن تبقى النقطه الأخير ان المواطن والحياه الكريمه هي الهدف … فنحن ” سعوديين ” ومن المفروض ان يكون لنا ما لغيرنا .. وان نكون في افضل حال من بين الشعوب لاننا ابناء هذا البلد والجميع يعرف ماهو مكانة هذا البلد الاقتصاديه ..
اخو المبتعث : راسلني على ايميلي لو سمحت من خلال هذا الرابط http://brhom.net/?page_id=7
بحكم خبرتي المفروض يا ابراهيم اول شي ان الهنود و الباكستانيين يتم وضع خطه لانهاء خدماتهم مثلا
خلال ٥ سنوات.. انتا عارف ان هالجنسيتين هم المستولين على الوظائف واغلبهم بدون شهادات..
تخيل يا ابراهيم في الشركه اللي انا فيها تم تعيين ولد اخو مدير العمليات الباكستاني خلال اسبوع من وصوله
من باكستان و براتب خيالي و طبعا هالشخص بدون اي خبره تذكر .. و اول مره قابلته فيها كان يسآلني
عن وظيفه في محل ملابس او اي معرض في السوق..
أكره هذا الوزير من قلب
طااااااااااااط ططططططططططططططططططططططططططططططططططخ
مو مثل اللي ايده في النار 
……و الراتب كله خصومات%100
اللي ايده في الماء
و القطاع الاهلي مو مقصر مثل مكتب تاجير السيارات
يطلع ريحتك و يكرهك حياتك
والتأمين الطبي من النوع…………..f
لو ان معالية اضاف الى ساعات >>>>>>>>4ساعات
لتحمد الله على وظيفته و منص……..بة
سؤال ياسعادة القرسون:
قبل كل شي ليه مثلا ماتقوم بخطوة ناقلة وتقول للناس وتواجه الشعب بإن ولدي أو ولد اختي أو أو أو يعمل قرسون في المطعم الفلاني ..
هل ترضى ان تعمل زبال(عامل نظافه) او سباك او خادم او………….
"
>>>>>>>>>و اللي احلى من كذا كله<<<<<<<<<
اذا تقدمت لطلب الزواج من بنت فلان………
بيسالك وش وظيفتك
و اذا انت ناوي بوظيفة حكومية اتبع التعليمات التالية
1ـ تقدم له دعوة بتناول العشاء مع سابق الاصرار و الحلف و الطلاق(سفرة طويلة عريضة )
2ـ تقدم له الهدايا(تدهن السير)
3ـ كثرة المدح و الثناء له(و هو ما يسوا شئ)
وقبل هذا كله لازم تكون خفيف دم و نكتي و مزاح وكذاب ومنافق " لا لا ترى الحين يسمونه النفاق الإجتماعي، لا تتصورون انها عاده شينه بالعكس في زمنا هذا أصبحت من الفضائل
اذا لم تتوفر هذه الصفات فيك فردد "ياليل مطولك "
ليه للحين مارددتوا ؟
دمتـــــــــــــــــتم سالمـــــــــــــــــــين
لو كان بنية وزيرنا الحبيب حملة الثانوي والمتوسطة فلا اظن أن ذلك يعيبه في شيء فلا يعقل أن يكون صاحب دبلوم أو ثانوي مديرا لشركة أو احد اقسامها
لكن في حال أن تكون الخطة لتوظيف أصحاب البكالوريوس فلا أظنها تنفع، ولا أظن أن الاشخاص أصحاب الكفاءات العالية بحاجة إلى أن يتم توظيفهم فهم يتوظفون اتوماتيكيا هذا بظني…. رغم ان ظني لا يصيب احيانا ولكنه يصيب في السواد الاعظم….
* ممكن لو أنهم يفتحون مراكز تدريبيه مجانية او برسوم رمزية لتأهيل العالم لدخول ساحة العمل ولأبتكار أساليب عمل جديدة بحيث تأهيل الشعب لوظائف ومراتب عالية…
* بصراحة هي حاااااجة متشعبه وتتعب، بس تعرف هالبلد ايش؟
هالبلد يتيمة مالها احد يراعيها ولا يهتم فيها ولا يخاف الله فيها
أرى أن الوزير مجتهد، وفكرته منطقية..
وأتوقع أنه يتمنى أن يحلم بإصلاح كبير وجذري -كما نتوقع منه- ولكنه يخاف على منصبه أو حظوته أو كليهما. أما أن يقال بأنه لا يملك الصلاحية فهذه مهزلة ما بعدها مهزلة، ولو صحّت وجب عليه البيان بذلك، بل والإستقالة إن تحتم الأمر.
والسـلام
خطأ نحمل شخص واحد مسؤولية الوضع الحاصل
و بالمناسبة أحب أثير ثلاث نقاط:
1- اللي ما عنده مؤهلات اش نشغله؟ مدير؟
2- التخصصات التي تدرس في الجامعات والكليات لا علاقة لها باحتياج السوق
3- ثلاث أرباع الأمريكان والأروبيين الذين يتقاضون رواتب شهرية تفوق رواتبنا السنوية ليسوا مؤهلين لشغل هذه المناصب ( مقالب)
ابو مطلق يعطيك العافيه على الموضوع المميز كالعادة ..
أنا بصراحه الاقي نفسي أتفق مع الأخ جهاد في كثير من اللي قاله .. خصوصا موضوع أن السعودة مثل كثير من المواضيع الاقتصادية و الاجتماعية تبقي وجهت نظر .. و الوزير اللي أحبه كثيرا لشخصة و ليس لاي سبب أخر .. عنده وجهت نظر .. وهي السعودة في كل ما يمكن أن يسعود .. و برضو اتفق مع الأخ جهاد في موضوع حدة الانتقاد ممكن تكون سلبيه على اللي راح يجي بعد القصيبي و نصير في حلقه مفرغه الجميع خايف يسوي شي عشان لا يصير فيه زي اللي صار في القصيبي ..
قضيه ثانية أحب أوضحها وهي .. أن الدكتور غازي القصيبي متعدد المواهب فهو شاعر و روائي و سياسي , و بالتأكيد هو رجل دولة .. بس البطاله موضوع إقتصادي بحت و الدكتور ماله بالاقتصاد كثير!!
أتذكر في عام 2004 قرأت كتاب صغير للدكتور عبدالواحد بن خالد الحميد باسم السعوده أو الطوفان .. الكتاب باختصار كان يتكلم عن جزئيه بسيطه و هي أنه لا يمكن سعودة أي قطاع أو مجال .. إذا لم نوقف المنافسه غير المتكافئه بين السعوديين و العماله الوافده اللي تقبل بأقل الاجور .. طبعا الدكتور عبدالواحد متخصص في الاقتصاد و الكتاب عبارة عن بحث علمي .. في الكتاب المذكور قدم الدكتور غازي القصيبي للمؤلف .. و كان وقتها – أي وقت التأليف – سفير للملكة في بريطانيا ..
بحكم أني قرأت كتب سابقة للدكتور غازي كتبت في وقت الطفرة كان الدكتور يتكلم و قتها عن أثر فترة الطفره علي المجتمع و كيف أن المواطن بدأ يترك كثير من الأعمال للعماله الوافدة , و يحتقر بعض المهن اللي كان يقوم بها سعوديين قبل زمن الطفره .. و هذا له أثر سلبي على الاقتصاد ككل .. المهم , الدكتور غازي هو وزير للعمل و الدكتور عبدالواحد هو نائب وزير العمل !! و للي غير مطلع على تكوين الوزارات في السعودية أورد له هالمعلومه .. هي غالبا أن الوزراء خصوصا الخدميين ليس لهم نواب بل وكلاء وزارة .. لأن النائب يعني أن الوزير لا يقوم الا بجزء بسيط من العمل و التفاصيل يهتم بها النائب .. يعني باختصار الدكتور عبدالواحد هو الوزير الغعلي للعمل ..
أعود لصلب الموضوع و هو السعودة .. و الموضوع بسيط جدا .. عشان نغري صاحب العمل يوظف سعودي فيه ثلاث طرق: الاول نوحد التكلفه للعامل السعودي و الاجنبي و الثاني نحد من توفر العامل الاجنبي و الثالث نوفر عمالة عالية المهارة و نادرة التخصص ..
الأول فيه طريقين للتطبيقه .. نرفع تكلفه الاجنبي و هذا يعني تضخم في الاسعار يساوي حجم و نسبة العماله اللي بنرفع تكلفتها .. يعني مثلا في قطاع التجزئه في السعودية نسبه الوافدين تتعدى التسعين بالمية فلما نرفع رواتبهم من الف الى ثلاث الاف يعني تضخم الاسعار بنسبه لا تقل عن الثلث .. وبعدين راح يصير تلاعب من أصحاب العمل يعني ممكن يكون الراتب الاسمي شي و الحقيقي شي ثاني و نرجع للمربع الاول .. طيب الطريقه الثانيه و هي خفض تكلفه العامل السعودي , بحيث تساهم الدولة في راتب الموظف اللي في القطاع الخاص .. للاسف الشي هذا صار بس النتيجه مبكيه .. صارت الدولة تدفع النص لمدة سنتين , عشان السعودي يكتسب خبرة .. و القطاع الخاص يترك السعودي بلا عمل في بطاله مقنعه تهلك اقتصاد البلد و بعدين يفصل السعودي بعد انتهاء السنتين مباشرة ..
الثاني هو المطبق الان و اترك للكم تقييم الواقع
الثالث توفير العماله الماهره ..برضو هنا ما ابي اعلق .. بس ابي من ابو مطلق يقيم لكم المهندسين اللي تم تعيينهم في السنوات العشر الاخيره في شركه ارامكو على سيبل المثال لا الحصر .. بحكم اني فني في الشركه و ابو خليل مفتش و عملنا قريب من المهندسين .. ابيك يابو خليل تقول للقراء الكرام كفائتهم و بالذات الناس اللي تصنف نفسها على انها النخبه أعني KFUPM .. تقييم من ناحية الكفاءه العمليه و التعامل المهني مع بقيه الموظفين .. و ان شاء الله اعود للموضوع هذا خصوصا , في بوست مستقل ..
ما ابي ارسم صوره سوداء عن البطاله و السعودة , المشكله هذي عالميه و دول متقدمه و غنيه و تسبقنا بسنين ما لقت للبطاله حل , و كل اللي قدروا يسونه أنهم يقللون من المشكله .. ياليت ماحد يصدق منك اسطورة أن السعودية دولة غنيه , لانها غير صحيحه على الاطلاق .. أكاد اقول أن العكس صحيح ..
همسه في أذن ابو مطلق ..
اعرف أنك تحترق عشان شباب هالبلد , وصدقني أن اشبهك بعد في هذا الشي , بس للاسف بعض اللي تحترق عشانهم ماتعتمد عليه في شي , الشغاله هي اللي تجيب له كاس الماء من زود الكسل , البطاله بالنسبه له عذر أكثر منها واقع ..
اعتذر عن الاطاله و الاخطاء اللإملائيه , زي ابو مطلق ما اقدر اقرا هالكلام مره ثانية ..
برهوم,
ترى معاليه مشغول بروايته الجديدة وهي بعنوان( مين قال الفقر عيب )
تحياتي لك
كهرمان
الاخ ابراهيم
كلامك عن البنوك غير صحيح
من واقع تجربه ، اقدر اقول البنوك اكثر الجهات الخاصة توظيفاً للسعوديين، والتوظيف لايكون في الوظائف الدنيا بل كل الوظائف الدنيا والعليا … اتكلم عن البنوك الكبيرة ، ساب – سامبا – الاهلي – الراجحي
عموما اعتقد ان عملية السعودة تواجه معارضة شديدة من القطاع الخاص والله يعين الوزير على المسؤولية ، لو يرفع الحد الادنى للرواتب وتوحد رواتب الاجانب مع السعوديين ستنجح عملية السعودة لان تكاليف العمالة الاجنبية ستكون اعلى من السعوديين وبالتالي تجبر القطاع الخاص على توظيف السعوديين
[...] حتى أننا أشبعنا الأمر حديثاً وصل إلى بعض الأحيان إلى هراء! هذا الأمر يعني إشغال الشعب بأموره الحيوية و إشغاله عن [...]
الفار مايطلع ينافق ألا بمطاعم ؟ صوروه رزوا صوره في الجرايد طال عمره
والله أنه أنجس من الفار .. ياعلماني كم لك من سنه وأنت تهايط وماتغير شي العطاله مثل ماهي وفي زياده بعد ؟ ودي أعرف وزير على شنو ؟ وزير بس تراكض بالمطاعم وأترزز بالصور تبيهم يقولون والله يتعب ويشتغل وهي كلها دقيقه ومن يوم تركب سيارتك وانت تسب وتلعن .أقول الله يبلاك في نفسك وفي عيالك مثل مابليت المسلمين . بالله هذي وظايف لدوله من أغنآ دول العالم ؟ هذا اللي قدرك ربي عليه ؟ تشوف نفسك الكفو وغيرك تشوف مكانهم بمطاعم وحلاقين ؟ والله ماترضاها لعيالك .. وياليتك حليت مشكلة العماله اللي كل يوم تزيد من الفيز اللي تشره فيها المرتزقه اللي وياك .. الله يسامح اللي مخلينك للحين المفروض مطيرينك من زمان لآن مامنك فايده .
القرار اللي نحتاجه انه تختفي العمالة الاجنبيه وبنصير بخير ,,,
..خله على :
حبيبتي انتي كالشمس في ليلة ظلمااااء .. هجاء غناااء رثاااء ببغااااء ..
حبيبتي مكم اكرهك يا شمطااااء.. واريد ان احووووسك في الرمضاااء !!
هذي اخر قصايد ابو غزغز وهو يقدم الشاورما لي بالمطعم ..
عموما لا بارك الله بعمره ..
والله يرد علينا الدكتور النملة ,,, الوزير السابق لوزارة العمل .
هههههههههه
غازي التحفة إلى مزبلة التاريخ
سبحان الله وبحمده سبحان الله العظيم
اللهم اغفر لحينا وميتنا وصغيرنا وكبيرنا وذكرنا وأنثانا وشاهدنا وغائبنا اللهم من أحييته منا فأحيه على الإسلام ومن توفيته منا فتوفه على الإيمان اللهم لا تحرمنا أجره ولا تفتنا بعده
اااامين
لا تعليييق
نسئل الله العفو والعافيه
أكره هذا الوزير المستهلك المنتهي الصلاحية من كل قلبي
..
نجتاج وزراء شبآآآآآآآب يبنون .. وحماسيين ومعاصرين ..
اغلب الوزاء صار من القوآعد << من وجهة نظري ..
ابو الشبآب المذكور آنفا شآعر وزير كاتب صحفي قرسون سواق تكسي بتاع كلوو ..
وما شفنا منه شي .. الا انه انسآن يجيد الترزز ..
قهر قهر .
..
[...] مساكين يا مضيعه الناس مو اطفشت من جلست البيت الناس محتاجة للراتب والوظيفة [...]
[...] مساكين يا مضيعه الناس مو اطفشت من جلست البيت الناس محتاجة للراتب والوظيفة [...]
انا سعيييييييييييييييييده بمدى الثقافه اللي وصلوا لها شبابنا الله يوفقهم ويسعدهم من جد مبسوطه تحيه للكاتب ولجهاد وللقحطاني ولللبقيه