وبعدين معاك ياعقلي الرسام ؟؟
إلى متى وانت ترسم لكل شخص صوره ؟؟
تعود عقلي على رسم صوره لكل شخص سمع عنه أو قراء له …
فمثلاً الكتاب في الجرائد … لكل شخص منهم صوره مرسومه في بالي .. اللي متين واللي طويله وبعضهم بنظاره وبعضهم ثقيل دم وبعضهم لابس وزار وبعضهم عاض ثوبه …وبعضهم وبعضهم وبعضهم .. وأعتمد في رسم الصوره على كلماته و طريقة تعبيره عن الأشياء
طبعاً في أغلب الأحيان أحب الشخص أو أكرهه من رسم الصوره بس .. وذلك اعتماداً على الرسمه المرسومه من قبل
” عقلي الرسام ”
وياما كنت أكره أشخاص وبعد مقابلتي لهم اكتشفت شئ آخر …
وهذا حصل لي مع بعض المدونين … وبعد مشاهدتي له أكون معطل الحواس لمدة 5 ثواني وذلك لنزع الرسمه اللي رسمها عقلي الرسام واستبدالها بالصوره التي امامي ..
وسوف أذكر لكم بعض الرسومات المرسومه في بالي لبعض المدونين سواء قابلتهم أو لم أقابلهم …
مثلاً …
أبو سعد … ضعيف وعجل ومطيور حبتين ( وطلع عكس هذا تماماً )
ماشي صح … نظارات كبير سن وجسم ومن النوع اللي عقاله راجع وراء من كثر القراءه والسياسه ( شئ صحيح وشئ بالعكس )
بندر … انسان بارد جداً (هادئ جداً) انطوائي ويحب التعبير بكل هدوء
محمد بن سالم … عربجي و شعره معكرش ويدخن ( طلع أقرع ومايدخن وفي قمة الذوق )
خالد العيسى … هادي جداً ومبتسم ( وطلع كما تخيلته )
عاشه … عجيز وضعيفه وتلبس نظاره ومن النوع اللي ماتضحك كثير ( وطلعت في بعض الأشياء عكس خاصه في الضعف 
)
انتروبي … نظارات وحبلها ورى الرقبه ..وماتحب اللي يستخف دمه وجاده في نقاشها الهادف
أسماء … صغيره سن ومطيوره وقوية ( وطلعت ام لثلاث عيال )
سردال … واحد ضعيف وانطوائي .. بس شفت صورته في احد المدونات وطلع برضو عكس الصوره المرسومه
مضيعه بيتهم … تحب تلعب كوره ومربوشه والظاهر انها كذا جد
يزيد الغريبي … ماعطاني فرصه اتخيله لانه حاط صورته
نكهات … من كثر المقاطع اللي يحطها لأبطال كمال اجسام راسم له صوره انه معصقل لأن اغلب اللي يحطون هالصور يكونون بالعكس 
زي اللي تحط صورة نانسي عجرم بغرفتها ادري انها انتصار الشراح … معليه نكهات عقلي ومايرسم
دبي … مصريه , متينه وتحب الترزز والتكشخ … وهذا رسمته من كتاباتها زي ماقالت عنه نفسها في احد التدوينات
مكسر … نظارات برضو, بدل جنزات ويقدر السيديات والايبود والميوزك الاجنبي خاصه
ملياني … تفاحه
عابرة سبيل … نظارات وكبه فوق الراس زي مشرفة المنزل القشراء اللي كانت مع كرتون ” سالي ” بس انها مو قشرا
فؤاد الفرحان … ماعطاني فرصه ارسم لانه حاط صورته
والكثير الكثير …
طبعاً الموضوع هذا يحصل لي مع الكل … ما اعرف اسمع بشخص بدون ما ارسم له صوره
طبعاً ليس القصد من كلامي الاستخفاف او الاستهزاء .. حاشى لله .. لكن مجرد رسمه ترسم .. ولا أكيد أكن كل الاحترام والتقدير للي ذكرتهم ..
لكن حبيت اشارككم بهاللي قاعد يدور في راسي ..
وهل هالشئ طبيعي ويصير مع الكل ؟؟؟
لاحظت اني ارسم الصور بناء على مواضيع المدون …
علشان كذا يامدونين خلوني ارسمكم صح …
ودي اسئلكم وش لون راسمين صورتي ان كنتم ممن ترسمون الصور مثلي …. لكن خوفي تردون علي بنفس الصوره اللي رسمتكم فيها ..
لا جد ودي اعرف الناس وشلون ترسم لي صوره …
هذي مدونتي وهذا كلامي وهذا تفكيري … وعقلكم وش رسم ؟
تنويه : فيه الكثير من الرسمات في بالي لغير المدونين المرسومين أعلاه … لكن اذا حابين يعرفون يطلبون في الردود
ههههههههههههههههههههه
الله يعطيك العافية … والله ماقدرت امسك نفسي من الضحك ..
بجد نفس اللي يصير معي …. بس ما راح احكي ولا عن احد أفضل الاحتفاظ فيها لنفسي …
طيب ايش بالنسبة لي … مع ملاحظة انه صورتي بمدونتي ..
تحياتي يا ابراهيم
هههههههههه
بصراحة عجبتني رسمتك لنكهات ….
وعن جد … قبل فترة كنت مجنون بصور ومقاطع كمال الأجسام … بس مو في التدوين
)
في منتدى من المنتديات (فيالصورة الشخصية وفي التوقيع … وفي الوجوه التعبيرية …)
واللي يشوفني يحسب إني … بطل في كمال الأجسام .. ما يدري عصعوص (نحيف
تحياتي
ههههههههههههه
بس شوف يا إبراهيم أنا قبل ما أحط صورتي الحقيقية كنت ولازلت حاط ذيك الرسمة حقت بوضروس
والكل يفكرني أشبه ، وواضح أن صورتك اللي حطيتها في بالك كانت قريبة من صورة بو ضروس
خخخخخخخخخ
سامي منصور : انت على البال ومرسوم … بس غيرنا الصوره بس روحة الحرم .. بس أكيد صورتك بتكون واحد ابيضاني وخدود حمر … بس كان في بالي انك كتكوت … يعني (صغير حجم) … وطلعت مجموعة كتاكيت
بس ليه ماتحكي وش راسم ؟؟ شكلك مسوي مصايب في العالم ههههههه .. اهم شئ انك ترسم مثلي … بس كيف رسمتي ماقلت لي؟
=============
Mr.NeGaT!Ve Says: هلا بك
يعني كلامي سليم عن نكهات 
( ياحبي لك يانكهات )
ههههههههههه ياماشي … صادق
بس ماقلت لي وش رسمتي ؟؟
ترا هذا القصد من الموضوع ابي اشوف العالم وش ترسمني ؟؟
لاني ماقدر ارسم نفسي
و أنا رسمتك نسخه طبق الأصل منى -بس تخين شويه- و السر هو تشابه الأسماء
و لم أرسم الكثير فى عقلي من المدونين، كانت هذه عاده عندي و انا صغير و تلاشت مع الأيام و لا أدري لماذا !!
يصير معي هالشي..لكن ماأتخيل صورة الشخص لكن أتخيل شخصيته..
بالنسبة لك أخوي إبراهيم..
أنا أتخيل شخصيتك إنك صريح ولامبالي..وتحب المرح..وو وبس لأني مستعجل..
لكن ايش الصورة الي في بالك لي..
looooooooooooooooool
الله يسامحك بس ..!
شكلك مب ملبس العقل نظارة هاي المرة !
بالعكس تقبلنا رأيك بكل صدر رحب !
D :
أنت مثل ما تخيلتك .. شرى أخوك اللي في الصورة !
ابراهيم عبدالغني : ايواه مظبوط احياناً من الاسم ترسم صوره … بس زين انك ماعاد ترسم صور ..
============
احساس : انا صريح ايه بس ابالي وبقوه … ويهمني ان اللي معاي مايتضايق … واحب المرح ؟؟ ذكرتني بالدببه الطيبون
============
دبي : لووووول نلبسه نظاره المره الجايه نفس نظارة الشاليهات …
لا ماحزرتي , اخوي اللي بالصوره عسكري والى الآن ماخلص .. علشان كذا تشوفينه اسمر وضعيف.
أول وحدة صح .. الباقي إسمحلي .. يمكن الإسم له أثر في النظرة
ولا حتى أجنبي وﻻ عربي .. البتّة .. سعودي حتى النخاع .. وحبتين خليجي ..
لا جنزات وﻻ بدل .. ما أحب شكلي بها خصوصاً وإني من نوع قليل الدسم
كان ممكن تفهمها بشكل سطحي وتقول الرجال دايم جواله يشكي منه
أما نكهات فماهو ضعيف .. الرجال معضّل نوعاً ما ماشاء الله (وأشوى إنه صديقي
)
إنت … أممم .. دب شويتين و طويل و رزّة .. اللي يشوفك يقول قحطاني 100%
مابضحك ابدا
لاني انا ارسم الناس كذا في مخي وبالاخير يطلع العكس تمااااااااااااااااااااااااااااااااام
وخصوصا البنات لما اتعرف عليهم واتقابل معاهم انصدم لما اشوفهم من جد ..
بس انت رسمتهم رسم ماقصرت والله …
بس انا ماحب العب كوره
ولا اعرف للكورة ولا افهم بالكورة 
..
مربوشه ممممممممممم اي دونت نوو
الناس تحكم على ..
قبل اي كنت مربوشه بس احس اني تغيرت كثير بس مادري يمكن للحين مربوشه
..
بس ذبحتني ضحك وانا اقرأ البوست ..
* طيب انت اول مافتحت مدونتك تخيلتك ××××××××××××× >> اخاف انضرب
بصير مؤدبه على شان تدورون على بيتي 
دمتم سالمين
أظن أن كل العقول رسّامة ، لكن فيه عقول تعرف ترسم ، و في عقول من جنبها ، و فيه ناس بين بين : ) ..
اللقاء الأول غالباً يرد فيه : توقعتني كذا ولا كيف ؟ : ) ..
ههههههههههههههههه
مقبوله منك يابوخليل
بس إن شاءالله أصير ضعيفه
عجبتني وضحكت كثير ،،
تذكرني بأحد الأطباء ،، حين زيارته للمؤسسة كان يظن أني كبيرة في السن ، وألبس نظارات ،، ولا أعرف للضحك طريق ،، يعني من العيار الثقيل ؟!
لكن باءت ظنونه بالفشل بعد ما رأى فتاة الثلاثين (عمري مو واضح ع شكلي
وسمع عن مقالبي و مواقفي المضحكة وكان طوال الوقت يناظرني هل أنت فعلا عابرة سبيل الجادة ،،
كما أنني لا ألبس نظارة
يعني كل رسمتك ( غلط)
أنا من النوع الذي لا يرسم بل يحب المفاجأة على أرض الواقع ،،
لكن لمست فيك الروح المرحة التي تجعلني أحب دخول مدونتك بجانب المفيد فيها
لك إحترامي
خخخخخخخخخخ أجل “عكس هذا تماماً”
بس من فين جتك فكرة عجل ومطيور حبتين؟؟
وتراك ما قلت لنا عن البقية… مثل أسامة ومحمد الشهري وأبو جوري وعلوش وفيصل العوفي و و و وغيرهم الكثير
أتمنى إنك تتكلم بشكل أكبر لأننا نبي نشوف صورتهم في عقلك الرسام
تحياتي؛؛؛
انبسطت كتير من البوست
اما رسمي لك فكان
انك شخص مرح ومثقف نوعا ما
في نفس الوقت
فهل هي نفس الواقع
ما ادري
ياترى ماهي رسمتي
عندك ؟؟؟
فيه ناس كثير تشبه لناصر القصبي … وانت واحد منهم (في عقلي الرسام) .. ليش ما ادري:)
MaXeR : سعودي ميه ميه … يعني نغير الرسمه ونحط واحد مشخص بالشماغ ” من دلعك ” والثوب حجازي … روح يامكسر خلاص غيرنا الرسمه … وبالنسبه لرسمتك ايه مظبوطه متين وطويل بس اللي يشوفني مايقول سعودي 100% … يقول ” هولي 100%
———————
مضيعه بيتهم : ” مابضحك ابدا ” ترى والله مو القصد اني اضحك ولا اتمسخر .. أنا أحكي لكم أشياء في راسي جد … والقصد بلعب الكوره هو انك من طريقة كلامك أحياناً كأنك عربجيه .. والعربجه تنربط بالكوره في عقلي … وبالنسبه لرسمتك قولي وماجاك علي
بس شكل الوصف ضيق خلقك .. يابنت الناس ترى الرسمه بالراس ماحد يشوفها
———————
متورّد : وشلون يعرفون يرسمون ؟؟ يعني يطلع نفس ماتخيل؟؟ والله ونس
——————–
عاشه :
ام مريم تراها رسمات عقل مايستحي .. وبالنسبه للضعف أنا أتحداك .. تسابقين ؟؟ اللي يوصل ال 100 قبل .. أوكي ؟ 
يعني انا رسمتي مضبوطه بالنسبه للنظارات وماتضحكين كثير ؟؟ يعني جديه في عملك .. وهذي الصوره رسمتها من سفراتك اللي تبع العمل .. ومافيه احد يرسلونه في رحلة عمل الا ان كان جاااد وحريص .. ولا ؟؟ احتراماتي
عابرة : لحظه وشلون كلها غلط ؟؟ باقي تسريحة الكبه ؟؟
وأزين لك انك ماترسمين … بس من خبرتك في علم النفس … وش الأشياء اللي تخلي الواحد يحدد معالم الصوره ؟؟ وهل هي مرتبطه بحاته اليوميه وأحداثها ؟
وحياك الله في المدونه كل يوم من الساعه 6 صباحاً الى الساعه 12 مساءً … انتي محل ترحيب
==================
أبو سعد : هلا حبيبي … والله الربشه والعجله رسمتها قبل ما اشوفك … وقتها كانت لك مناوشات في بعض المدونات …. وخاصه تدوينة نيارت حقة القبيلي والخضيري والزواج … ويعني حاقه زي كده ..
وبالنسبه لأسامه = لابس كندوره ورجال في الاربعينات وصاحب عين لماحه وهادئ ومحترم ..
محمد الشهري = مدرس , متين وقصير , وحبيب ومحترم
أبو جوري = حاط صورته مايعطيك فرصه
علوش = طل الصبح ولك علوش , شبه المغني
فيصل العوفي = برضو شفت صورته مع صحن الفول ههههههههه
البلاوي كلها في رسماتك يابو سعد ,, اطلع وبان
=================
خووووخه : تتوقعين فيه احد بيقول ان الوصف هذا غلط ؟؟ مرح ومثقف .. الله يزوجك ياشيخه
والله من ناحية مرح , ان شاء الله اني مرح , ومن ناحيه مثقف , برضو ثقافتي مش بطاله وااسمع كثير واتابع كثير واتعلم كثير , يعني رسماتك ازين من رسماتي , يبن لنا نفتح باقي البومك , شكلك تتخيلين صح مو زيي
=================
كارلوس : هلا والله ابو تميم … ههههههههههههه اما انتي شكلك زيي في الرسم , انا متين وناصر ضعيف وطويل وناصر قصير , بس على قولتك هي تجي بالحالها , ليه وكيف؟؟ ماتدري
وبعدين كل واحد حر برسماته
=================
موضوع جميل ابراهيم،، وبصراحة لا أذكر هل رسمت لك صورة أم لا؟ و أعتقد أن مانكتبه يشكّل كثيرا صورتنا في ذهن القاريء.
المهم، أنك أحد الأشخاص الذين تشرفت وسعدت بالتعرف إليهم بحق.
لك التحية عزيزي
ههههههههههه
أشوى انك ما رسمتني
والله أنا مثلك ، لكن لم ألتق بكثير من المدونين
أما في العادة فالشكل يصدمني
خصوصا عندما أتحدث مع شخص بالهاتف في العمل ، ثم أزوره في المكتب أو يزورني أتفاجأ به
شي طبيعي تنرسم صورة ببال الواحد لشخص سمع عنه او احتك معه بدون مايشوفه
انا قابلت كذا شخص من النت .. بعضهم والله جبتها صح
وبعضهم طلع شكل ثاااااااني مرة
ومرة صارت لي مع مدرس خصوصي .. صوته بالتلفون تقول ذا مايدخل مع الباب ومعضّل واقشر بس يوم جا عندي بالبيت ودك تبلعه من زود الحبابه و وزنه هقوتي 50 كيلو يعني حولي ههههههههه
برهوم حاولت ارسمك بس يمكن قرب معرفتي بمدونتك وقرائتي لتدويناتك تحول بين تخيل أو رسم تخيّلي لـ شخصك الكريم
انت رسمتني :$ ؟
هههههههههههه …
لا تعليق ..
جميل الموضوع
هههههههههههههه والله جلست اضحك على كل رسمة واقارن باللي في بالي
“أسماء … صغيره سن ومطيوره وقوية ( وطلعت ام لثلاث عيال )”
بفهم من فين جايب لي العيل التالت خخخ هم اتنين وقلت يارب ارحمني وبلاش زيادة
صغيرة سن.. ما ادري بس ترا عمري واضح في واحد من التدوينات
>> دور عليه 
مطيورة.. مو مع الكل.. في البداية رسمية بس آخد على اللي قدامي بسرعة لو دخل مزاجي وكان مفرفش.. يعني اتوقع اني احش وزير في وجهه >> زي ما سويت مع وزير السياحة خخخ
اما قوية.. حسيتها ضربة ههههههههه مو صفة بس ليش يعني قلت قوية
امممم
انت….
متخيلتك قصيرون شوي وسمنان حبتين وفرفوش وما همك احد خخخ
مرة خرجاوي مرة حجازي .. إرس لك على بر
.. المشكلة أنا لا كذا وﻻ كذا .. قايل لك سعودي 
..حركات البربسة في الثياب ما أحبها إلا شي بسيط أو ما يبيّن ممكن أتقبلها عادي 
كويّس إني جبتك حول السالفة
بالنسبة للرسم التخيلي فهي فضول من وجهة نظري ،،
وهو فضول محبب للطرف الآخر ،،
وهي أيضا صفة محمودة وإجتماعية ، تبين مدى براعتك في العلاقات الإجتماعية == عدال يا محللة
أما عن الكبة فهذي آخر شي أفكر فيها
لا تحاول معاي ، ما عرفت ترسم
إحترامي
ابغى أضحك بس قلت لا…… لا تتخربط الصوة اللي في راسك
انا برضو اتخيل صور الناس من كتاباتهم …. يا ريت أحد من جماعة علم النفس يشرح لنا الموضوع عشان نكون في الصورة
باقي التعليق اللي حذفته مدونتك:
المهم نجي لصورتك في خيالي: انا متخيلتك واحد طويل و وسطي منت تخين ولا نحيف … و أكثر شي متخيلته انك واحد نظييييييييييف ومرتب.
ومن تدينة طلعة الخرج اتخيلت انك “حرك” يعني منت كسلان .
ها ؟ أحد يعرف السيد أبراهيم في الحقيقة و يقول لنا هل هذه التخيلات تقرب للحقيقة ولا بنت عمها؟
آه و بالنسبة لنظاراتي….. أنا ما ألبس نظارات و عندي طول نظر كمان
سلم لي على عقلك الخربان والمبوش والمتفتف بعد ابد عقلك يبيله توضيك مارسمني صح ولارسم
ماكسر صح والله يانا قمت اضحك يوم قلت جينز لماكسر ماكسر تخيل شكلك بجينز لا وفانيله علاق الي تحت الثوب لاومقاسها xl
اقول ابراهيم ترا انا ماني عصل يعني وزني 74الى 76 وماكسر مقصر وترى العصل هو ماكسر
وعقلي رسمك على انك راعي شاي وتحب الجسله والجرايد وما وماتخلي شي في الجرائد الا تقرأه وخاصه المحليات طبعا الشماغ مايطيح من رأسك لاوبنت البكار بعد
اقول اذا كان في رسمه ثانيه لعقلك المبوش قلها
اقصد توضيب مو توظيك وشفيني انا
أحيانا يحدث هذا معي عندما أبدا في قراءة التدوينتكم ولكن لن أعبر بذلك
رسوماتك جميلة أخي
تدونية دمها خفيف
من أولها وأنا بضحك
وزاد ضحكي التعليقات….
تدوينه جميلة تبعدنا عن المشاكل والسياسة شوى
بصراحة أنا العكس تمام وهذا شئ سئ فينى ماأعرف أوصف ولا أتخيل ملامح أحد
والمصيبة أنى أنسى أشكال النااس أفشل بصراحه
بس خيالك واسع بقوة
أمل
خالد : الشرف لي يابو وليد … أمثالك مكسب لي
============
عابر سبيل : يعني عقلك رسام بعد … وعلى قولتك التفلون خداع …
============.
موسعن صدره : الحمد لله انه شئ طبيعي ريحتني .. خفت انه مرض نفسي لا سمح الله :]
وبالنسبه لشكلك الظاهر مانت بعيد من الفارس اللي بمقطع الفديو اللي بمدونتك
============
بندر : مو قايلك انك رايق وهادي
============
اسماء : العيل الثالث هذا من عندي … لأني أرسم للشخص رسمه حق اربع سنين قدام .. ومن هنا الى اربع سنين ان شاء الله يجي الثالث
والثالث انا خلطت بين عمر مجاهد وعدد العيال الظاهر .
وقويه أقصد فيها مثابره بالحياه
============
مكسر : لاجبتها بالتسعين بعد
============
عابره : شكراً للتحليل الإيجابي
والرسمه اللي في البال ماراح نغيرها سواء صح او غلط , وراس مالها رسمه 
============
انتروبي : اي والله خليها زي ماهي … تراها زينه .. وبالنسبه لعلم النفس شرحته عابره ..
وبالنسبه لرسمتك جبتيها صح … مو زيي الرسم عندي طلع مضروب .. ولا واحد طلع مواصفاته فيه وكلها عكس تماماً … وحتى النظاره طلع محلها بعد نظر ياليمامه
============
نكهات : اي والله كنت راعي شاي بس بطلت … أما الجرايد على قوتك راعيها وبقوه .. حتى الوفيات اقراهم واللي معلن عن رخصته الضايعه بعد … وبنت البكار هذي كنت مدمنها بالمتوسط والثانوي … وكان لي فيها خلطه سريه .. بحيث انها ماتنفك الا في البيت … مو زي الشباب كل شوي يعيد ترتيبها … لووووووووول والله من زين ذيك الايام … بنت البكار ونظارات بشاور
============
أبو مروان : يعني طلعو كثير الرسامين
============
قطر الندى : هلا بك , أهم شئ الضحكه
============
أمل : تنسين الأشكال … والله مصيبه … أنا أنسى الأسامي وهذي بعد مصيبه … بس صار عندي خبره وشلون أطلع من هالمواقف بدون مايلاحظ الشخص اني ناسي اسمه …
برهووووم >>> فيس شيطان مقهور
تف من فمك ياخي!!!
اتنين يطلعوا القرون ترااا قال عيّل تالت للسنة الرابعة قال
هههههههه
انا احتج … الكل كلام كثير … وانا كلمة وحدة …
هههههههههههههه
الله يرجّ ابليسك تنكت D:
لاهنت مرّ على مدونتي و هات انطباعك
بانتظارك