في زيارتي الأخير للخرج واللي كتبت عنها هنا لو تلاحظون ماكان فيه صور لدجاج ولا لحمام … مع انهم كانو موجودين بس وش اللي صار؟؟
طال عمركم قبل لانجي باسبوع انتشر مرض افلونز الطيور في الخرج .. وبدا في مزرعة ( المستقبل )
وحنا قاعدين نتقهوى في الليل كان معنا واحد من جيران الاستراحه …وقالنا عن سالفته مع افلوتزا الطيور …
كلموه العمال الساعه 3 العصر في تاريخ 19/11/2007 وبلغوه انه في حالة وفيات في الدجاج … وطبعاً صاحبنا هذا يملك مزرعه دواجن وفيها مايقارب ال 60 ألف دجاجه … المهم بعد ماكلموه وقالو له عن حالات الوفاه هو توقع ان الموضوع عادي … قال للعامل يعني كم طير توفى ؟ قاله العامل تقريباً 3000 طير !!!! هنا الرجال درى ان الموضوع فيه شئ … والله يجزاه خير قال للعامل وقف سيارات البيض والدجاج ولاتطلع من المزرعه .. حرصاً منه انه لايكون فيها فايروس افلونز الطيور …
وتوجه للمزرعه ووصل عندهم تقريباً بعد ساعتين … وعلى ماوصل المزرعه مات 5000 طير , يعني الفين طير خلال ساعتين ..
اللي سواه الرجال انه اخرج العمال وقفل الحضاير , واتصل على وزارة الزراعه ليبلغهم بالموضوع … وهم كانو على مقربه منه .. لأنه مجاور لمزرعة المستقبل وهي اول مزرعه تم اكتشاف المرض فيها …
وحضرو وزارة الزراعه ومثل مايقول صاحبنا يقول كانو منهكين من العمل في المزارع الأخرى المصابه … المهم الحين وصل عدد الطيور النافقه الى 9000 طير …
قالهم راعي المزرعه وش بتسوون الحين؟؟ قالو بناخذ عينات منهم وبنشوف هل هي فلونزا طيور ولا لا !! خذو عينه من 10 طيور و 5 منهم طلعت مصابه … قالو بنرسل العينات للمستشفى وبننتظر الى بكره وبنقرر هل نذبحها كلها ولا لا؟
قالهم راعي المزرعه , انتو من جدكم؟؟ للحين شاكين ؟؟ أقول .. أنا راعي الحلال واقولكم اذبحوه .. الله يجزاه خير كان حريص على المصلحه العامه أكثر من نفسه … وقال لنا والله ياكل هالدجاج يروح ولا ان واحد من العمال يمرض بس !! كيف الا يموت ؟؟ … االله يحزاه خير ويعوضه … المهم بعد اتصالات من الوزاره ويمين ويسار .. قررو انهم يذبحونها …
طبعاً الوزاره ماعندها امكانيات ولاهم عارفين وشلون يذبحون الطيور … نزلو من سياراتهم عصي وليحان … بيذبحونها بالضرب !!!
60 الف طير بيذبحونها بالعصي ؟؟ راعي المزرعه قالهم هذي طريقه غلط ماراح يمديكم تذبحونها … قالو له طيب طفي المراوح وارفع درجة الحراره وهذا الشئ بيذبحها …
ويقول لنا راعي المزرعه بالعاده لو طفت المراوح بس لمدة كم ساعه ماتت الطيور … لكن هالمره طفينا المراوح ورفعنا درجة الحراره في الحضاير ومع هذا جيناها بعد كم ساعه ولقيناها حيه ترزق !!! ( عناد السالفه 
)
المهم جاء العامل الباكستاني وقالهم .. بابا انا في سوي طريقه هذا كله موت … قاله مندوب الوزاره وشلون ؟؟ قال انا بحط سم حق النباتات في الماء والطيور بطبيعة الحال عطشانه منه الحراره .. ولما يشربونه بيموتون … وجبرو طريقة العامل وبالفعل بعد 20 دقيقه كلها ماتت ..
وجمعو الطيور وحفرو لهم حفره كبيره .. عن طريق الاستعانه بمعدات الجيش اللي يحفرون فيها الخنادق … وحطو الدجاج و نثرو فوقه مادة ” الجير ” وهالماده بدورها تحلل الدجاج وتخليه مثل الرماد … وتم دفنه .. وقالو لهم بتتم المزرعه والعمال وراعي المزرعه تحت المراقبه لمدة 3 أيام …
وطبعاً كتصرف احترازي منهم … تم تغطية 5 كيلو من كل الجهات وقتل الطيور في هذه المنطقه ( بالعصي ) وكان لمزرعتنا نصيب … فتم قتل الدجاج والطيور … وكان مايقارب ال 100 طير
بس باقي دجاجه عندنا مانتبهو لها … جينا لقيناها بالحالها هي ومعاها فروخ … اثاريها كانت راكه على فروخها ومنخشه في احد الاماكن ومانتبهو لها
والغريب في السالفه … انهم بعد ماذبحو الطيور في مزرعة صاحبنا … أخذو الكراتين حقة البيض الجديده والتي لم تستعمل و معها اكياس الأعلاف واحرقوها أيضاً , وكانت كميه كبيره , ولا أعلم لماذا ؟؟ يعني معقوله كراتين البيض بتنقل العدوا؟؟
الرجال طلب منهم تسجيل كل شئ , في حيث لو ان هناك تعويض يجيه تعويض لكل شئ …
والجدير بالذكر .. أن مزرعة ” سهباء ” من احد المصابين … وقتلو فيها مايقارب المليون وشوي .. والمشكله ان البيض والانتاج حق ذاك اليوم طلع للسوق .. ويقولون ان الوزاره في الاسواق تسحب البيض ..
يعني ياجماعة خلو عنكم البيض والدجاج … ويازين السمك زيناه
الله يعين ، هذا كله ولين ألحين ما ثبت انتقاله ( بين ) البشر
أجل لو ثبت الظاهر أنا وأنت بننذبح ( إحتياطا )
الله يعوض صاحب المزرعة خير ويعوضكم ،،، أهم شي ما نستغني عن شاورما الدجاج !
الله يحفظكم و يحفظنا ..
الكلام كيف بننذبح ؟ أنا ما أرضى أنذبح بعصي و ليحان و الله !
> وخر تكفى :d
الله يكفينا الشر ،و يعوض المسلمين خير ..
ههههههههههه عليك شرح يابراهيم
الله يبيّض وجه راعي هالمزرعة ويخلف عليه بأبرك منها .. ويخلف عليكم بعد
من يوم سمعت طاري الخبر وانا معتزل الدجاج وطايح باللحم والجمبري
لنا مزرعة بالغاط ويبي من يشيّك على الدجيّجات اللي فيها لا يكون فيها بلى بعد الله يستر
الله يحفظنا وإياكم بحفظه
الله يحفظنا بس
شكلنا بنرجع للبن والتمر
سلام
لا حول ولا قوة إلا بالله – جد الله يعوض على صاحبك خير.
ويجزاه ألف خير.
أيش هالوزارة هذي ! والله من جد ماعندك أحد، أجل وش يعرفون يسوون؟؟؟؟؟؟
سبحان الله
الله يعوض الرجال خير، ويبارك له في اللي باقي من حلاله
الله يستر بس اقول مالت على وزارة الزراعه جايين بعصي عشان يقتلون الدجاج يعيني على التطور
ترى دجاج دووووووووووووووووووووو زين
من فرنسا 
الله يستر علينا من زكام ذا العصافير
>> من جنبها
خخخخخ
الله يعوض علي صاحب المزرعة الطيب خيرا إن شاء الله
نادرا ما يكون امثال هؤلاء بين رجال الأعمال ربنا يبارك له في ماله إن شاء الله
وربنا يهديهم الحكومات كيف ما يكون عندهم أمكانيات للذبح كل هذه الطيور الطريقة السلمية ؟؟؟
الله يعوض كل التجار ومن الحين يا برهوم مالنا غير السمك و الستيك
الله يحفظنا ويعويض عليه وعليك
بس ماشاء الله عليه نشمى والله
أمل
عابر سبيل : يازينهم وهم يلاحقونا بالعصى
========
بندر : يحفظ الجميع خيو
========
متورد : هههههههه على قولتك السم ارحم بكثير , الله يكفينا الشر بس
========
موسعن صدره : يابن الحلال ترى حنا قادرين على قيمة الدجاج علشان نجيب القمبري ,, طيب وش فيها لو صار في كبسة جح ولا مندي كوسا .. والله ارخص واصح
والله يكفيكم الشر
========
الوعد : ياليتنا نرجع لها غير مجبرين … كان ماشفنا كل واحد يدف كرشته قدامه … بس تتوقع وقتها كم بيصير سعر اللبن ؟؟
========
يوسف منصور : وبعوض عليك ياصاحبي
========
خالد العيسى : الوزاره يعرفون يلبسون بشوت ويصورون ويصرحون تصريحات ترفع الضغط وتعلّ ..
========
نكهات : دجاج دوو زين بس مادري عنه ذبح اسلامي … لأنه ياخوي أحس لحمه أحمر بزياده
يازين الضبان بس
=======
good morning K.s.a : ههههه الله يكفينا الشر
…
برايفت :- وما ادري ليه دائماً تعليقاتك يفلترها الأكسيميت على انها ردود مزعجه ( سبام spam )
=========
أبو مروان :- اي والله يابو مروان والله كبر بعيني بعد ما منع البيض والدجاج انه يتوزع بالاسواق ,, مع انه كان بامكانه … بس الرجال يخاف ربه وملتزم
والحكومات مشغوله بالأهم
==========
محمد بن سالم : مالنا الا المرساه … ياخي سويت فيني خير يوم دليتني عليه
===========
امل : الله يعوض على الجميع … وسبحان الله القحاطين نشامى بالفطره … تتوقعين من الجينات ؟
الله يحمينا واياكم من هذا المرض…..ولابد للوزارة ان تستمر في مواجهة هذا المرض قبل ان يتفشى …….لك تحياتي
أما أهالي الخرج مو طاقين خبر للموضوع , معي بالدوام الناس متحمسه تطلب كل صباح فطاير دجاج :p
تبي الجد
فقدت الأخوين … السمك يم يومين بس أبي دجاج : ( .