مجلس الوزراء يضيف “بدل غلاء المعيشة” لموظفي الدولة والمتقاعدين بواقع 5% لمدة 3سنوات
ماراح أطيل لأني لايعه كبدي جد ..
بس ودي أسئل الآن الزياده 5% و هالزياده محدده لمدة ثلاث سنوات ولموظفين الدوله و للمتقاعدين ..
طيب العاطلين عن العمل واللي يشتغلون بالقطاع الخاص واللي يشتغلون بالشركات الأخرى والمقيمين وش لهم؟؟
يحترقون؟
يسوون إضراب ؟؟
يهاجرون ويصيرون عماله في الإمارات؟
جد عيب وربي … وياوجه استح
يعني لو الزياده 100% ولا 200% بيحددونها لمين؟؟
الظاهر بتصير فقط لأهل سدير والقصيم.
5% ومحددينها لفئة معينه ومؤقته بعد؟؟
طيب يامجلس الوزراء انتظرو هالشعب الى أن ينفجر … وبعدها حاولو تلمون الشتات ..
الموضوع الى الآن تحت السيطره لكن لم يجد أي اهتمام منكم ..
أنزلو الى الشارع وزورو المجالس , وأسمعو صوت الشعب
وأقصد مجالس المواطنين اللي فيها جلسه أرضيه ومشب في الزاويه وددسن قدام البيت ,
وليست مجالس المواطنين اللي يتلامع رخامها ويقف الخدم مرحبين والروز والمرسيديس تقف أمام الأبواب.
وماراح أقولكم زورو المواطنين اللي أصلاً ماعندهم مجلس , لأنهم ساكنين في بيوت من صفيح.
إلا على طاري بيوت الصفيح ؟؟ ماقلتو لي أهل الشمال ما مات منهم أحد بعد ماعطيتوهم سكر وبطانيات؟؟
===================
لاحظو التعليقات اللي على الخَبر وركزو على اللي يقولون حنا جنودك ياوطن !! وش دخل حنا جنودك بالزياده 5% ؟
الغلاء يضرب السعودية بشكل غير طبيعي
انزلوا إلى الأسواق وتفرجوا على أصغر المنتجات والسلع وزياداتها غير المنطقية..
المشكلة أن هناك طبقة كبيرة تشتري بدون أن ترى ولا تشعر بما تدفع حتى لو ارتفعت الأسعار 300% ويبدو أنك يا أخي إبراهيم تغرد خارج السرب..
قبل فترة قرأت أن الكويت نجت من الأزمة الإقتصادية الحالية التي تضرب معظم دول العالم وأحد الأسباب هو فك ارتباطها بالدولار.. لا أتخيل مالذي سيحدث لو انهار الإقتصاد الأمريكي تماما بعد فترة مالذي سيحدث في السعودية؟!
الأمر يحتاج إلى المراجعة من الجذور والزيادة التي كان يتأملها الجميع لم تأت كما يتشهوا خصوصا أن القطاع الخاص يبقى محروما من أي سياسة إصلاحية ومن أي ميزات أخرى
كثرة الكبت تولد الإنفجار ،،
بس شخصياً ،،
من دول العالم كلها ،،
ما أتوقع نسوي أي نوع من الانفجارات ،،
،!
كاركاتير معبر
وصمتنا يزيدهم تمادي
كل دول الخليج جي .. و خاصة الدول الغنية منها ..!
سنين و هم يتبرعون و يهدون حق برع .. خاطري اعرف شو سوو الجماعة بهالبيزات؟!
و من الصوب الثاني ..بالدز يرفعون معاشات المواطنين ..!!
والله خايف بكره يقولون معونات من الامارات للشعب السعودي .. حرام والله اللي بيصير
الله يفرجها ياشيخ
برهوم
لا تنسى انها لمدة 3 سنين
يعني استغلوها زي الناس وخلوكم فالحين
ترا ال5% تسوّي كثيــــــــــــــــــــر
مشاريع ومشاريع ومشاريع ترا… بس انت فتّح مخك!!
اش المشاريع؟ أنا أقول لك..
ال5% هدي ارفعها من الراتب.. اشتري بها طبق ( بيض ) ودور على بيوت الجيران وبيع البيضة بـ5% من سعر الطبق!!
أو.. جمّع تبع 3 شهور من ال5% واشتري بها دجاجة بيّاضة! وبيع البيض كمان بسعر يغطي لك ال5% في يوم من الأيام..
أو .. اشتري بها ورق.. اكتب فيها كلمتين مديح.. سلحتة (على قولة الحجازيين) و (طرارة) على قولة النجديين.. ارسلها بعدين لواحد منهم.. مين هم؟ هدوليك اللي ال5% عبارة عن صحن حلا أو زبدية فواكه في سفرته اللي تتكب يومياً وشعبه يبات جيعــــــــان!!
أو….
خليك ساكت.. واغسل يدك بالتراب.. واستنى الفرج من ربّ العباد
في فمي ماء يابرهوم ….
كنت والله انتظر بدل للعاطلين , وإلا حنا الموظفين مانبي شي …
أبي بس يضبطون الأسعار ولا تزيد , وإلا ماشفنا شي من الـ15% إلا زيادة أسعار بدون أدنى مبرر …..
وش ذنب العاطل اللي وراه بزر وإلا كومة بزران
برايفت برهوم :
(( يعني لو الزياده 100% ولا 200% بيحددونها لمين؟؟
الظاهر بتصير فقط لأهل سدير والقصيم.))
الله يسامحك بس يابرهوم .. وراك علينا !!!
أنت تعال وأنا أوريك شي أردى من الصفيح
لا نريد زيادة … و لكن نريد حلا … والزيادة دورها زيادة هذا الطمع والجشع…
الله يخارجنا بس
الظاهر بتصير فقط لأهل سدير والقصيم
!!!!!!!
مراااااحب برهوم
يا جماعة البيض صار 14 ريال ZZZZZZZZZZZ 40%
حتى البسكويت الأخضر مربعات بالبندق صار بريال زيادة 100% …. عرفتوه … اللي جاي من كرواتيا
من زود حب واحد من الشباب لهذا البكوت قال شعر 6 ابيات بعد ما زاد سعره
الحال أبدا مايسر عندكم
نتمنى إنه في مجلس التعاون يتم مناقشة هالأوضاع لأنه بعد الزيادات من قبل حكومة الإمارات وقطر
… عيب إنه السعودية تظل من غير ما ينعكس الخير على الشعب
في المؤسسة الي أستغل فيها… عندنا 23 مستشارين سعوديين ودكتورة تدرس في كلية المؤسسة وموظفات وايدات من السعودية…
خير الكلام ماقل ودل متى ما قمنا بمحاربة سراق المال العام ومن يدعون بأنهم يحافظون عليه ساعتها سوف ننعم بالعيشه الهنيه…وهذا مستحيل الى أن تقوم الساعه
(الي الجحيم ياوطن وياشعب عيش القهر)
هذاشعارمدعون حماة الوطن
أعزائي أهل سدير والقصيم … أنا أقصد انهم بيحددون منطقه معينه
لا تفهموني غلط …. ياشينكم محد يحاشركم
عاشه : هذا اللي يبونه عندنا … والله ياخوفي ياعاشه بكره يقولون في الأمارات ” السيطره على العماله السعوديه ” والله يجزاهم خير اللي لموهم …. ودام ديرتهم ماتبيهم خليهم يشوفون رزقهم ..
عادي .. وش فيكم زعلانين
احمدوا ربكم ..
صدق انك وجه فقر
على قولتهم .. شين وقوي عين
انا اول مره اشوف شحاثين .. يتشرطون على الصدق .. وعلى كميتها
وين شحاثين ايام زمان ..
اللى يبوس يده وجه وفى اذا جته صدقه
ما بالكم انها خمسه بعين العدو
اقول .. يا ليت تشوفون الشحاثين اللى بالحرم بمكه كم هم قنوعين ويرضون بالصدقه اذا جتهم
وعمرهم .. ما قالوا .. قليله
الله يصبرنا على كتم اللي بصدورنا …
ياعالم وش ذنب محدود الدخل .. يعني اللي يستلم 2600 / 1200 قسط سيارة / 1300 أقساط بنك .. ويبقى 100 ريال / يوم تاكل من البقالة ويومين انتظر لين الله يفرجها ..
والله ثم والله هذا اللي حاصل ..
لا حد يقولي يستاهل ماحد جبره !!!
إلا الدنيا جبرته .. ومطالب الناس جبرته .. والبحث عن الستر جبره .. ومطالب الحياة والزواج جبرته ..
وش تبيه يسوي يتزوج بنقالية ؟؟
عطونا الحل ..
ترا بنموت قهر قبل مانموت جوع ..
السجن يهددنا يوميا ..
ياعالم الواحد منا يبي يحفظ موية وجهة .. الله لا يحدنا على الطرارة ..
لكن الله بقوته وقدرته راح يفرجها بإذنه …
[...] متأكد إن صاحب قرار الشنطه هو نفسه صاحب قرار الـ5% لأن كل القرارين السكوت عنهم كان [...]
السلام عليكم
انا اقول مالها داعي الزيادة عسى ماتكلوفو 5% بس اجل قطر منح تكب كب هي والامارات وانا قصيمي وترانا مثلنا مثلكم ماذقنا شي بس لبفرق ان البدو والجنوبيين يمدحون من هل امراء والملوك ويجمعون وحنا ساكتين وعلى فكرة ترا 5% ماتسوى شي للراتبه 1500كاشير او سكيرتي يعني يزيد 75ريال وش يسوي فيها
والي يقول اشتري دجاج وبيض لايصجنا وترا انت ولا احد يرضى انه يبيع بيض ولا تقعد تفلسف
على كلن الحمدلله على كل حال
يااوجه استح صدق ؟؟؟؟
الاخ اللي مو عاجبته الزياده وحايمه كبده منها ..
اقول لك احمد ربك على النعمه والامن اللي عايش انت وغيرك فيه
وش يقول اهل مصر وسوريا والهند وغيرها كثير من الدول اللي مايلق زاد يومه …
اقول انت تبغى زيادة علشان تسافر فيها وتبطح فيها …
وبعدين اهل الامارات اللي انت وغيرك فرحان فيهم خيرهم لاهل الهند وسوريا وباكستان والشعب ماله إلا التراب …
اخوي …اللي بتنفجر انت وغيرك لانك على قولتك كابت قهرك
اسمح اقول تفكيرك لايتعد راس خشمك …لانك تبغى فلوس وانت جالس عند امك ..
اعمل واجتهد واجمع الفلوس ووطور نفسك وقدراتك …
مو كل شيء الدوله مسؤله عنه …
وإذا صدق زهقان من السعوديه ماتشوف شر الامارات ترحب فيك وفاتحه بيبانها ..