كنت أفكر أكتب بعيد عن الإنتقاد .. لأني أحس بالإحباط من المناخ السلبي و النظرة المتشائمة المنتشرة بيننا كشعب و أمة .. أدمنا النظرة السلبية و صار عشان الناس تقرأ لك لازم تختار واحد من ثلاث مواضيع إما انتقاد أو تزلف أو تهريج ..بس اليوم صار موقف أجبرني على الدخول في موجه عنيفه من المناخ السلبي ..
الموقف للأسف صرنا متعودين عليه .. إنسان جردناه من إنسانيتة بكلمة -وافد- يجي يستجديك أنه يغسل سيارتك .. و تفهمه أن السيارة نظيفه ومش محتاجه غسيل .. تمتلاء عيونه بالدموع .. يداريها عنك .. و تواري نظرتك عنها .. ينظر إلى السماء يصلي بصدق و رجاء .. يرجع يقص عليك شي من القصة .. الكفيل ما يدفع له راتب و يمنعه أنه يعمل مع أحد ثاني و يرفض ينقل كفالته .. و ينهي كلامه يتذكر كيف كان كفيله القديم طيب معاه .. و كيف أن الكفيل الحالي – أو سجانه بالأصح - مش كويس .. تعرض عليه أنك توصله للجمعيه الخيرية لتوعيه الجاليات اللي ما تبعد منك سوى خطوات .. يرد عليك بأدب ما راح يفيدوني لأني … و يسكت شوي .. تكمل أنت لا لا مش مهم حتى لو كنت مش مسلم لازم يساعدونك .. يقول لك رحت لهم ولا فادوني بشي .. ينتهي كلامك معه , لكن معاناة الإنسان هذا تستمر إلى أن يقضي الله أمراً كان مفعولا ..
طبعاً مثلي مثلكم تعودت أني أبحث عن جهه مسؤولة .. أحملها الذنب و أصب عليها و ابل من الغضب .. و أسر في نفسي كثيراً من الشتم .. أدور عن أحد مسؤول عشان أثبت لنفسي أني مالي ذنب و أني بريء و أن مهمتي فقط محصورة في البحث عن الجاني !! عشان أقدر أنسى الدموع اللي سكبت أمامي .. و عشان أنسى أو أتناسى الظلم و الغبن اللي شفته بعيون ذلك الرجل .. عشان أقدر بآخر الليل أحط راسي على المخدة و أنام بدون ما تطاردني أحلام الضمير ..
المسؤولية ما حملتها ذلك اللئيم اللي نسمية زيفاً كفيل .. و لا على الوزير اللي تكالب عليه لوبي الوصاية و مافيا الأعمال .. المسؤولية مش على سلطتنا الرابعة الغارقة في الفشل و مستسلمه له .. المسؤولية على تجارة الرق اللي جملنها و حسنها بقانون سميناه نظام الكفالة .. أرجوكم ألغوا نظام الرق !!
عبدالله القحطاني
شوف ياصديقي
هذا الواقع لن يتغير الا بإتباع نظام العقود
وإلغاء نظام الكفالة
تقول لي ليش؟
فيه أجانب مستفيدين من هذا النظام البئيس تقلي كيف؟
يجيك الأخ السعودي ويطلع فيز عمال ولأنه عنده واسطه
فيطلع عشرات الفيز
يستقدم هؤلاء العماله
حلاق-نجار-كهربائي-ميكانيكي-مافي معلوم
(خوينا مافي معلوم صار مهندس أجهزة كهربائية تعلم في اسبوع ماشاءالله عليه)
المهم
ويفتح لهم محلات
وياخذ من كل واحد منهم مبلغ معين ثابت شهريا
المكسب وين يروح؟
في جيب العامل طبعا
ولهذا السبب إنتا كسعودي مستحيل تنافس هذا العامل في أي بزنس
لأنه راح يشتغل 25-ساعة يوميا
وانتا عندك متطلبات أسرية
وأنا شخصيا أعرف أجانب مليونيرات
بيحصلون على مبالغ ضخمة
بالمقابل
تجد هناك كفيل ظالم-ترا مو كل الناس يخافون من عقاب الله حتى لو انه كان يصلي-
أو شركات كبيرة تستقدم هؤلاء العمالة
ولاتعطيهم رواتب بالأشهر
وعلى فكرة العمال الصينيين الي ماسكين مشروع شركة ينساب
عملو اضراب لدرجة إن السفير الصيني شخصيا جا
لأن الشركة-السعودية- أخرت رواتبهم شهرين
++++++++++
هممممم الحل؟!!
في رأيي يكمن في خطوتين أساسيتين:
(1)عقد عمل-كما هو متبع في معظم الدول التي تحترم حقوق الانسان- بين صاحب العمل والعامل الأجنبي
اذا قصر العامل في عمله تستطيع ملاحقته قانونيا وبالنظام
واذا بخس صاحب العمل حق العامل ولم يعطة أجره كاملا يقتص منه النظام على وجه السرعة ويحاكم ويسجن ويتم وضع عقوبات جزائية على جميع أعمله ومشاريعه
(2) لا يستطيع العامل الأجنبي ادخار أو تحويل أكثر من راتبه
المنصوص عليه في العقد(معظم دول اوروبا لاتسمح بتحويل أكثر من 40% من الراتب يعني 60% يجب أن يصرف في البلد
تحايلت على النظام؟!
تطرد مباشرة وتوضع في القائمة السوداء
(3) وضع حد أدنى للأجور والرواتب تكفل للإنسان العيش حياة كريمة
(حد أدني للسعودي وحد أدنى للأجنبي)
لأن أصحاب البزنيس يحققون أرباح ضخمة جدا جدا جدا
ولاحظ انه مايدفع ضرائب ولا يقدم خدمات للمجتمع (زي رجال الأعمل اليهود الزنادقة في أوطانهم مثلا!!!)
(4) زي ما لعنت سلسفيل الباب وزارة التعليم العالي ولم توفر جامعات محترمة بتعليم متطور كافية لإستيعاب جميع خريجي الثانوية
تقوم بعمل معاهد فنية تهيء(لا حظ تهيء مو تقلي معاهد التدريب الفني الفاشلة) الشباب لإفتتاح وبدء عملهم الخاص كسمكري وميكانيكي وكهربائي
لسعودة سوق العمل
بيني وبينك يابو عابد فيه ناس مستفيده من هذا الموضوع
ومستعدين يضحون في أي شيء لعدم تغيير هذا الواقع الأليم للشاب الطموح
المطحون والعامل المأكول حقه
طولت كالعادة
معليش خطأ مطبعي لأني كنت راح أكتب خطوتين وبقدرة قادر صترو أربعة
الرجال رجال
http://www.worldgames1.com
أتوقع لو تم ربط رواتب العمالة بسفراتها . . بحيث يكون التأخر في دفع الراتب سبب لمشكلة سياسية . .
قد يساعد إلى حد ما هؤلاء المظلومين
السلام عليكم
نظام الكفالة نظام ظالم وهو أقرب الى الرق وأنا كمقيم في السعودية انشأت مدونة تتكلم عن المشاكل التي يواجهها المقيم يوميا في مملكة الانسانية
http://muqeeminksa.blogspot.com
نظام الكفاله منبعه النظره الفوقية للمجتمع السعودي لكل ما هو غير سعودي، أقول هذا و بكل أسف
فنحن مجتمع مبني على النعرات و الفوقية ، فوقية النجدي على ما سواه و فوقية القبيلي على الخضيري و فوقية السعودي على المقيم و فوقية الحاكم على المحكوم
هو مجتمع مبني على اسس الطبقات و الأكرم عند الله أكثركم فوقيه
للأسف مجتمعنا ينقصه الكثير قبل أن يصبح مجتمع بما تحمله الكلمه من معنى
تحياتي
مرحبا عبد الله..
إلغاء نظام الكفالة بكامله مو في صالح أي بلد.. هو بس يحتاج لتعديل..
يعني مثلا: بدل ما يكون الكفيل هو المسؤول الأول والأخير عن المقيم يكون المقيم هو كمان مسؤول عن تصرفاته في البلد.. كيف?
يكون بينهم عقد عمل مدته مثلاً سنة وعليه شروط من ضمنها إنه المقيم لو يبغى يشتغل عند أي احد تاني يشتغل عادي لكن يكون بعلم الكفيل نفسه.. ويكون بينهم عقد مسجل في المكاتب الحكومية زي الجوازات وغيره ومكتب محاماة كمان.. بحيث انه لو صار أي ضرر يكون كل واحد حافظ حقوقه..
في ماليزيا نظام الكفالة فيه أكتر شي للشركات التجارية وما يحق لأي مواطن إنه بس يستقدم على الطالع والنازل شغالات أو سواقات؛ وحسب علمي إنه مصرح له بوجود سائق واحد وخادمة واحدة لكل بيت بشرط انه راتب الكفيل ما يقل عن 3000 رينجيت ويدفع مبلغ يساوي راتب العامل لـ 6 شهور مقدم كضمان انه الكفيل نفسه ما (يفلسع) بحيث لو ما أعطى لمكفوله راتب شهرين متتابعين المكفول نفسه يمديه يروح يشتكي عليه وياخد راتبه.. إلى هذا الحد أشوف ان الكل ضمن حقه والحمد لله..
على العكس؛ أهلي عاشوا في السعودية قرابة 50 سنة واتصور ما يحق لنا نشتري أي عقار أو حتى سيارة إلا بإذن من الكفيل! والحمد لله انه الكفيل هدا أخويا الكبير!!
المشكلة انه النظام ما بيفرق بين العمالة وبين المقيمين القدامى يعني اللي على الأقل لهم 20 سنة في السعودية وفوق وكتير نكون نحن المضررين!
sultan989:
اهلا بيك أخوي سلطان .. بصراحة لما كتبت هذا الموضوع كان ببالي أني أقسمه لأكثر من بوست .. بس ماشاء الله عليك ما بقيت لي شي أقوله ..
أعجبتنب كلمت لما قلت “فيه ناس مستفيده من هذا الموضوع ومستعدين يضحون في أي شيء لعدم تغيير هذا الواقع الأليم” هالكلمة تختصر نص مشاكلنا .. تحياتي لك .
__________________
مثقف عربي:
للأسف سفارات هالوافيدين شريك بالظلم اللي يصير عليهم .. يعني لو كانوا يشوفون من ورى هالمساكين مصلحة كانوا دافعوا عنهم .. بس للأسف ما وراهم مصالح .. أتذكر قضية السفارة الفليبينية لما هربوا زوجة و أولاد أحد السعوديين .. خلالتلك الفترة حصل السفير على أضواء و حضور في الصحف تحسده عليها رئيسة البلاد ..
تحياتي لك .. أخوي
_________________
مقيم في السعودية:
هلا بك .. أتوقع الأوضاع ما راح تستمر كثير على هالوضع بس ياليت ما يتأخر هالتغيير ..
_________________
ياسر الغسلان:
حياك الله أخوي ياسر ..
توقفت كثير عند كلامك.. برأيي تركيبة مجتمعنا فيها شي من الفوقية.. عند بعض الناس – الله يشفيهم- بس أعتقد أن الوصاية تلعب دور أساسي و أكبر من الفوقيةفي مجتمعنا.. يعني الملتزم وصي على غير الملتزم .. موظف القطاع العام وصي على أموال و رقاب الناس!! و قيس على كل شي .. لي عودة لموضوع الوصاية أن شاء الله ..
تحياتي لك ..
_________________
asma:
مرحبا أسماء
لما الإنسان يعيش في وطن لأكثر من عشرين سنة .. أعتقد أنه يستحق جنسية هذا البلد .. أو لو ما كان يبي الجنسية المفروض يعامل معاملة خاصة .. أنا تكلمت مع بعض الأخوان من حضرموت .. يقولون أن الجنسية السعودية كانت تباع بنص ريال .. اليوم كفلائهم هم أخوانهم ..شي غريب مع أنهم عاشوا بالسعودية أكثر مما عاشوا إخوانهم ..
تحياتي لك
البلد يبغلها مراجعة حسابات
مايسوى على الناس عيشه زي كدا!!!
حسبي الله ونعم الوكيل
تعبت وأنا أتحسب.
وماشاء الله عليك أستاذ عبدالله أحساس أنساني راقي مافي أسمى من الشعور بمشاكل الأخرين.
JUST HOPE:
فعلاً ما يسوى على هالمساكين العيشة هذي .. في هالدنيا ما يهضم حق الضعيف إلا اللئيم .. و ياكثر في هالزمن ..
تحياتي لك ..
معلش رجعت تاني
تصور يا عبد الله؛ أبويا راح السعودية واستقر فيها من أيام الاستعمار البريطاني على ماليزيا! يعني حتى قبل 50 سنة!! وهديك الأيام كان الجواز السعودي يتوزع ببلاش حتى مو ينباع بـ نص ريال (على أيامهم نص الريال كان له قيمة الخمسين أيامنا) بس ماكان الوالد مخطط انه يعيش هناك طول العمر..
هنا عندنا الاندونيسيين اللي عاشوا في ماليزيا أكتر من 10 لهم بطاقة خاصة شبيهة بالبطاقة الشخصية تبع الماليزيين لكن بلون مغاير ويحق لهم من خلالها الاقامة الدائمة ويعاملوا معاملة المواطن ما عدا بعض البنود.. ومع هذا لو صار عندهم أولاد على طول اولادهم بياخدوا الجنسية!
يا سيدي أنا حاولت أفهم نظام الكفيل بدول الخليج، إنو أفهمو، عبث.
يعني استوردتو نظام الحياة الأمريكية بكل معنى الكلمة، نفس الثقافة الاستهلاكية، نفس النظام الاقتصادي…إلخ.
طيب ليش ما يتم استيراد أنظمة العمل الأمريكية بالمرة، شنو استوردنا كلشي، وقفت على هي يعني.
سلطان رأيه سديد
تبون الصراحة ما افهم واجد بالانظمة هذي
بس اعرف اسولف كحرمه
بمعنى أني تعرفت على عالم جديد اسمه “الحبشيات”
عن طريق شغالتنا بعد ان احتدينا بمماطلة المكاتب
فاضطرينا للبحث عن حاجه جاهزة واخذنا حبشيات
الغريب في الموضوع ان كل ما طلبنا منها الفيزا تقول موب معي مع الكفيل
والاغرب ان الكفيل يأخذ منها 3آلاف ريال سنويا
والمُريب بالامر انهم يسكنون فلل كل فله فيها تقريبا 12 حبشية يرأسهم حبشي وزوجته يقولون له عمي
وهو موب عمهم
وهذا الحبشي يصير له بيزنس معين
يعني عنده بقالة او مغسلة او ورشة سيارات ويأجر الغرف عليهم
وغير كذا كل اسبوعين يروحون اجازة لبيتهم وينظفون له البيت ويملون المطبخ ويتقاططون لتسديد الفاتورة بس لانه جابهم من هناك ولقا لهم عمل هنا
وكلوووو يسترزق
الكفيل من هذا ومن الشغالات ,, وهذا من بيزنسه ومن الشغالات كمان ,, والشغالات مننا
learn english | تعلم الإنجليزية:
بعض دول الخليج مثل البحرين و قريباً الكويت .. فاعده تجهز لإلغاءة .. و البديل أن العمال يستقدمون من قبل شركات , و هذه الشركات مسؤوله قانونياً عن العمال .. و لو بغى أحد يستقدم عامل يروح لهذه الشركات و يتعاقد معهم .. طبعاً النظام هذا أفضل شوي من حكاية الكفالة .. و اللي زي ما قال سلطان قاعدة تستعمل بشكل سيئ جداً..
asma:
حياك الله دائماً .. كلامك صحيح على الأقل الناس اللي زي والدك مفروض يعامل وعامله خاصة .. خليني أقول لك سالفة .. في سوق قديم بالدمام أسمه سوق الحب .. قبل فترة بسيطة رحت مع الوالدة – الله يحفظها – لهالسوق .. و لما دخلنا أحد المحلات .. تفاجأت بأحد العمال يجي لعندي و يسلم علي بحرارة .. أنا بصراحة أستغربت من الموقف .. و سألت ايش الموضوع قال: أنا أذكرك وأنت صغير كان عمرك أقل من ست سنوات كنت دايماً تجي مع الوالدة هنا .. سئلت: شلون عرفتني .. قال: أنا زبايني القديمين أعرفهم واحد واحد و أعرف حتى عوايلهم .. قلت: له ليش أنت كم لك سنة قال أنا لي أكثر من ثلاثين سنة هنا بالسعودية .. الناس اللي زي كذا يستحقون أنهم يكونون مواطنين ..
تحياتي لك
العائِشَة:
هلا بك ..
أنا سمعت عن موضوع الحبشيات .. بصراحةوضع العمالة في البلد يخوف .. في مشاكل كثيرة .. و للأسف مافي أحد يلتفت لها ..
يعني خذي مثال مشابه لموضوع الحبشيات .. موضوع اليمنيين .. قبل خمس سنوات تقريباً .. كان نادر تشوفين يمنيين يبيعون في بقالة .. الآن تقريباً ثلاثة أرباع البقالات يديرها يمنيين .. و المشكلة أن صاحب هالبقالات واحد .. أصله من اليمن و حصل على الجنسية و جاب ربعه .. ما عني مشكله أنه يفيد ربعه المشكلة أن نص ربعه جايين تهريب .. يعني ما عنده أي أوراق ثبوتيه .. و لو لاقدر الله سوى جريمة .. مافي أي شي ممكن يدل عليه أو يوصل له .. باختصار الرجل هذا ماله أي وجود قنونياً ..
تحياتي لك ..
اول شي احب ارد على الاخ سلطان ٩٨٩
ايش فيها لو العامل اشتغل على قولتك ٢٥ ساعه باليوم و صار غني؟؟
هذا تعبه و حلال و اللي يجمعه ماهو حرام واذا تبي تصير مليونير روح كد و اتعب و كافح زي الوافد.
ولا تحب تشتغل ٨ ساعات باليون و تصر مليونير،،
النظام اللي صاير يا برهو ان الشخص عندنا يبغى ياخذ الموظف لحم و يرميه عظم،،
وانت تذكر الشخص اللي قابلناه وعنده عمال يبغى يآجره كانهم الات ثقيله عارضها للتاجير
وتر:
مرحبا بك أخوي .. فعلاً بعض العمال صارو سلع تتأجر و تتداول .. عشان كذا سموها الرق الأبيض .. نوع جديد من الرق .. الله يصلح الحال ..
تحياتي لك ..
[...] جداً إذا ماكانت هناك عائلة بها 11 فرد 8 منهم فوق سن الـ18 والكفيل متعجرف!! تجارب.. Getting a Malaysian Passport…. Today’s [...]