السلام عليكم ورحمة الله وبركاته
شئ حلو ان الانسان يشتغل في بيته … ويحاول يصلح اللي يقدر عليه
وماهو لازم كل ما خرب شئ ولا تعطل … ركضنا وجبنا احد يصلحه
وخصوصاً ان فيه شغلات كثير تخرب في البيت والواحد يقدر يصلحها … ومع هذا نشوف البعض يتصل على العامل لإصلاحها
البعض منهم يفعل هذا لجهله بطريقة التصليح …
والبعض الآخر لكسله او لترفعه عن فعل مثل هذه الامور التي تستدعي احيانا اتساخ اليدين وعرق الجبين
لن أطيل عليكم
أنا ولله الحمد .. أحب أن أعمل بيدي ما استطيع فعله .. سواء كان نجارة, سباكة, صبغ, تلييص, وماني شين في الطبخ بعد .. 
وفي الأكل مافيه أزين مني بعد
وأحب أ تعلم ما أجهله في أمور البيت
( أصلح أكون زوجه صالحه؟؟خخخخ)
وهذا الشئ ارجعه لحبي للأعمال اليدويه أولاً …
وثاناياً ..لتأثري بوالدي أطال الله في عمره على الخير, و الذي كان يعمل كل شئ في البيت بيده …
وبديت اتعلم الأشياء هذي من فتره طويله .. وهي عن طريق جلوسي مع الوالد ومساعدته … أو عن طريق مراقبة العامل والتطبيق المباشر
حتى في بعض العمال اجيبه يسوي شغله معينه … واذا عرفت طريقتها … أوقفه واحاسبه على اللي سواه واقوله خلاص انا بسوي الباقي
وعلشان كذا لدي عداوات كثير من جهة العماله
بس طبعاً لي تخبيصات كثير … وآخرها كان في مزرعتنا وحنا نمدد الكهرب أنا وأبوي لغرفة العمال …
وغلطنا في التوصيل وركبنا السالب مكان الموجب … واحترق الواير 
بس الحمد لله سلطان اخوي كان قريب من الطبلوون وفصله بسرعه
بس الغلطات هذي تعلم … وتكسب درس في كل مره .. بس الاحتياطات لازم تكون موجوده
مالكم بالطويله
اليوم انا بعطيكم درس بسيط في السباكه
وهو طريقة تغيير حنفية المياه … وهي عمليه لن تستغرق منكم اكثر من ربع ساعه ( اذا مشت الأمور على خير)
وستوفرون ما لايقل عن 60 ريال
وهو قيمة تصليحها من قبل العامل
_____________________________________
عندي مغسلة المطبخ منخفضه شوي… وهذا الشئ تعب المدام في غسيل الصحون
فقمت بتغييرها ..
والخطوات كالتالي …
في البدايه .. الحنفيه المستخدمه هي من نوع جيد ومتوافر في الأسواق … وسعره ممتاز .. ستجدونه بما يقارب الـ 65 ريال وراح يزيد وينقص على حسب شطارتك في المكاسره ( كم
والأشياء اللي بتحتاجها
زراديه ولزقه بيضاء لزوم التسريب ومفك
أولاً : قم بقطع المياه عن الحنفيه
ثانياً : قم بفك الحنفيه باستخدام المفك او الزراديه .. اللي يناسب معك
وبعدها تقوم بتنظيف المكان اللي بتكرب عليه الحنفيه وتركب القطعتين الخاصه واللي مبينه معانا بالصوره وتلف باللبيضاء
وبعدها تطلع الحنفيه وتركب قطعها مع بعض … وتبداء بتركيبها في محلها … ويكون التركيب بالطريقه هذي
تركب الجهه اليمين وتبته شوي وتركب اليسار وتثبته شوي باستخدام المفك او الزراديه .. وافضل الزراديه لأنها اريح
وتستمر في التنقل بين اليمين واليسار الى ان تثبت من الجهتين بنفس الوقت
لأنك لو ثبت اليمين بالكامل وبعدين ركبت اليسار بالكامل راح يكون فيه تسريب … لأن الحنفيه ماراح تثبت ميه ميه
وبعد تثبيتها … تقدر تروح وتعيد شبك الماء
بعد التشغيل طلع معاي تسريب في احد الأطراف
وطلع الاشكاليه في اني ما شديت التيب الأبيض وانا اركبه
وهذا درس استفدته .. ما قلت لكم في كل تخبيصه فايده
يعني لازم تشد التيب .. وتقدر تستغني عنه اذا كان أطراف البيب اللي طالع من الجدار نظيفه
وزي ما قلت لكم ماراح تآخذ منك 10 دقايق
وكان الله غفوراً حكيم
————————-
إن شاء الله لي دروس ثانيه في السباكه .. في تركيب أهواز المغسله وتركيب الفلتر وتمديد السخانه
ودروس بسيطه في الكهرب وتغير الاناره وتمديداتها ( بس هذي بتكون بدون تخبيص لأني استفدت من الدرس اللي في المزرعه)
ودروس في الصبغ وتغيير كوالين البيبان
بس هذي كلها تعتمد على شغله … متى بتخرب هالأشياء؟
متى ما خربت صورتها ونزلتها
واذا احد منكم عنده خبرات سابقه … ياليت يشاركنا فيها
————————–
ملاحظه انا لاحظت ان الحنفيه في الصور طلعت صغيره !!
تراها مو بالشكل هذا لأنها كبيره ومن اطول اللي لقيته بالسوق…
بس المشكله فيني وفي يدي ..
أصلح اسوي دعاية للجوالات
كلها بتصير صغيره وخفيفه
هذا المشروع الجاي ..
هههه
ممتاز ماشاء الله ..
لا تنفع هذي الدروس ..
انا بابا برضو من دي النوعية (اللي يحبو يصلحو الأشياء بيدهم)
حتى احنا البنات – وانا شخصيا- أستفدت
بس طبعا مو أصلح حنفية موية .. اشياء على قدي
تجربة جيدة أخ ابراهيم ..
البركة في العمل اليدوي ..
حسب المعلومات اللي وصلت لي عن سالفة واير الكهرب اللي أحترق في المزرعة وكثافة الدخان المنبعث من الغرفة وماصاحبها من هروب وأصوات مفرقعات مما جعل وكالة الطاقة الذرية توجهة الانظار لكم خوفاً من وجود مفاعل نووي
ههههههههههههههههههههههههههههههههههههههههههههههههههههههه
الحمد لله على سلامة الوالد والاخوان بقيت ……. من تجاربك يابوخليل
ما شاء الله ،،
مثل أخوي الكبير عنده الخبرة فـ السباكة والكهرباء والدهان ووووووووو
بس أنا أحب أشاهد بدون ما أطبق ،،
مرة حاولت أركب حنفية ، جرحت إيدي بقوة ،،
كيف ما أدري ،،
حاولت مرة 2 أركب لمبة ،، من حرارة التوصيلة احترقت يدي وطاحت مني اللمبة و انكسرت ،،
فاشلة بقووووووووة
عساك ع القوة
والله انك شقردي
هذا اللي المفروض يصير .. لو كلٍ اشتغل في بيته كان قضينا على نص العمالة الموجودة، ولو سمحوا بقيادة المرأة كان قضينا على النصف الآخر << ناويها تشعلل
بس يعطيك العافية والله .. شرحك ممتاز وواضح. اصبر كم يوم تلاقي موضوعك بالمنتديات “منقوووول”
ماشاء الله ،،،
اقول ابراهيم انت تشوف دعايات “البركة بالشباب” ؟ تصلح معهم هههه
زين ماسويت،، ومن جد شكلك العدو الاول للعمالة
لكن الشغلة يبيلها مخمخة و واحد رايق … وانت ماشاء الله عليك شكلك من جد رايق وحق مخمخة بعد الله يزيدك
تصدق شجعتني اصلح بعض الشغلات في البيت لها فترة تحتاج تصليح ،، كنت متعيجز اجيب احد يصلحها …:)
يعطيك العافية
ما شاء الله تبارك الرحمن ..
الله يزيد ويبارك ..
سبّاك ؟ .. ما شاء الله أشوف المدونين كل يوم واحد طالع لنا بحرفه ..
اللي حطّاب واللي سبّاك
يلا عقبال ما يخرب باقي البيت عشان نتعلّم
..
ماشاء الله عليك برهوم اتحسنت الحالة النفسية أشوف
أحسن شي طبعاً العمل اليدوي.. أبويا الله يرحمه وأخويا الكبير من دي النوعية اللي يحبوا يسووا الشي بنفسهم أما بقية أخواني ماعندي أحد هدولي جايين في زمن الدلع وهاتوا العمال يسووه
انا جربت مرة بس أعيد تركيب اللي تبع الغسالة من الحنفية للغسالة الاتوماتيك وخربت الدنيا خخخ وماعاد صار يرضى يركب راس اللي أبداً الين ما غيرنا الحنفية نفسها لأنها كانت بلاستيك وانا بهدلت فيها طبعاً.. بس بعد كدا خلاص فهمت الشغلة هع
شكلك من دحين بتضمن شغلانة بعد التقاعد.. مشروع ابراهيم المصلحاتي
ممتاز يا ابراهيم بس اهم شي لعد تمسك كهرباء وطبلون. الحمدلله ربي سلمكم.
تعلمت من أبوية نفس العادة ، وبنيت جدار صغير ، ليست ، وعملت صبة في مرات مختلفة. اشتغلت سباكة وكهرباء مع بعض الحوادث البسيطة
شي واحد لمن جيت كندا استحيت منه ، ما اعرف اصلح شي في السيارة. يعني لمن اروح للميكانيكي اغير قماشات الفرامل يستغرب مني يقلي ماتعرف تسويها بنفسك؟ ايش رايك تعرف تصلح سيارتك بنفسك؟ ياريت تدينا تدوينة في الموضوع.
شكراً
ayaneeq : وش الاشياء اللي على قدك ؟ صارحينا يا حجّه
————————
بندر : البركه في الشباب
————————
الإعلامي – الخبر : والله يابو عبدالله انها صرقعت فينا … بس اللي خلانا ننحااااش من الغرفه … هو ان الصوت كان يحيرك .. وما تدري من وين جاي … بس والله الموضوع بسيط كلها تغيير محلات … بس الحمد لله اني سألت ابوي قبل لا اشغل … وقالي ايه مظبوط … و لا كان كليتها هههههههه
————————
طلال : وانت شيخ الشقرديه … وانت اوحيت لي هذي فكرة الموضوع بعد ماشفت درس : كن حطاباً ..
————————
تميم : لا ابد لا يبي لها روقان ولا غيره … انت ابداء وبعدها بتدمن .. وخصوصاً اذا جاك الوالد و الوالده بعد ما تخلص وقالو لك .. بعدي ولدي .. هذا العيال اللي ترفع الراس .. وبعدها بتخقققققق
————————
nOuf.a.s : هههههههه يخرب بيتنا علشان تتعلمين؟
الشباب فيهم الخير .. بس يبيلهم من يشجعهم … بكره بيطلعون لك النجاريين والكهربائيين .. بس اصبري
————————
asma : زين ان الواحد يجرب … وكل غلطه بتعلومه
وفيه قطعه خاصه ترى حق المغسله … يصيرين تشبكينها على طول وتقدرين تتحكيمن في الفتح والتسكر وتجي على شكل حرف T …
والوظيفه المقترحه تراها جيده وفيها خيرررررررر
————————
Yasser : لا حنا ماخين الاحتياطات اللزمه … بس الغلطه صارت بعد التشغيل .. بس ربك سلم … وهي زي ماقلت الشغله خطره بس الوالد معه خبره تأهله ..
وبالنسبه للسياره والله لي فيها .. وخصوصاً ان عندي دورات فيها .. من توضيب المكينه الى تغيير القماشات والسيور … بس يا ياسر عيب الشغله هذي انها اخطير من سوالف البيت .. فمثلاً البريكات ممكن تركبها وتمشي لكنها ماراح تكون مضبوطه … واذا خربت ماراح تكتشف الخراب الا وانت متعلق بالشجره
… والشغله الثانيه ان يبيلها عده ..
بس فيه شغلات ممكن الواحد يسويها وبسهوله .. مثل تغيير الزيت ولا تغيير البطاريه وفيوزات الكهرب ومثل هالشغلات …
تخيل ياسر فيه شباب مايعرف يغير البنشر !!!
ما شـاء الله عليــك
مشرووع شاب ناجح للسباكة
يطلبوون مدرس في المعاهد التطبيقية..
و الله ودنا كل الشباب الخليجي، يتعلم هالأمور البسيطة ،
كما علمت من سياسة البنغالي في التصليح ؛ أنه يفك القطعة – و هو يمكن أول مرة يفكها – و يحفظ طريقة الفك حتى يرجع القطعة الجديدو مكانها
– ما يبالها -
http://www.ehow.com/ هذا موقع أجنبي نفس فكرتك و لكن بالفيديو
علي التميمي : ياخوي وينك من زمان؟؟؟
انا من زمان أدور لي على موقع زي كذا … وربي من افضل المواقع اللي زرتها
تسلللللم
وترى البنغالي وغيره من اللي يجون يشتغلون في البيت … نفس الشئ .. يفك ويجرب ويطبق علينا … واذا تبي تتاكد جرب اسئل الكهربائي سؤال يمين او يسار في الكهرب وشوف وش بيقولك … حتى بعضهم يقولك انا اصلا ماعرفت الشغل الا هنا
بس من يسمع
الوالد من عادته لما اكون متواجده يعلمني لو صار مثل هذي الامور كيف نصلحها-مثل تنظيف الحائط واخفاء الشقوق وكيفيه دمج الالوان للصباغه
اذكر اني ركبت بلك المكيف بنفسي (الوالد ما كان موجود) وهذا كان من دروس الالكترونيات في المدرسه
ومع اني بنت بس احب احط ايدي -يعني لو ما كان في حد موجود لازم اعرف كيف اتصرف
ماشاء الله عليك .. الحمدلله أن في أزواج شحبون المشاركة والمساعدة ومش كسولين ..
ذكرتني في أبوي أي شي يخرب بالبت نقول : يبه وينك ” ماشاء الله عليه ”
سعدت بزيارتي لمدونتك
يعطيك الف الف عافيه يا معلم برهووم..
عابرة سبيل : طيب شغلك سليم … كل غلط بتعلومه .. ومافيه احد يولد عالم …
بس انتي الظاهر ناويه شر .. قطع اصابع وكسر انوار … وانا اتوقع السبب في هذا هو الارتباك مع القليل من الخوف … لأن الجرح نتج بسبب الضغط النفسي … وسقوط اللمبه هو بسبب الارتباك …
وش رايك في التحليل النفسي ؟؟
وعذراً ترى التعليق كان عالق … لأن الموقع حجب الآيبي الاماراتي .. مدري وش فيه عليكم … بس تمت المعالجه
……………………
layal : يعني لو تزوجتي واحد من النوع اللي مريح باله … ماراح تتوهقين .. وانتي كذا ارتحتي وريحتي …
……………………
ندى الفجر : حياك الله ياندى … ويالله شدي حيلك وتعلمي لك شغله بكره تنفعك .. اذا تزوجتي واحد ما يحب المشاركه
وسلم لي على الوالد … وهذا اللي مفروض يكون من الأشياء اللي يعلمونها الآباء للأبناء
————————-
محمد بن سالم : حياك الله يابو سالم … وعقبال ما تعلمنا وتشاركنا بشغله من شغلاتك الخنفشاريه
ضغط نفسي ..!!
الحين لما أركب حنفية يصير عندي ضغط نفسي
أجل ما أركبها من البداية أفضل
المسألة وما فيها ، إني إندفاعية ،،
كنت ناوية أكون أفضل من أخوي و أثبت له إني أعرف أشتغل مثله
بس للأسف ثبت إن ما حولي أحد فـ هذي الأمور
بس تدري
حلو الواحد يحلل تجارب الآخرين
تحياتي
ما شاء الله عليك ..
حلو ان الواحد يشتغل بيده .. يزين الشغل اللي يبيه بطريقته ..
ابوي الله يحفظه كذا .. بتاع كله !!
وانا تعلمت منه اشياء كثيرة ..
* فكرة جديدة في التدوين شكراً إبراهيم ..
أنا حطيت ايميلي فهالمدونه عشان يوصلني مواضيعها قبل فترهـ بسيطه ,, تصدق استغربت يوم قريت بداية الموضوع أنك ما تحلطمت ع شغله معينه
بالنسبه للموضوع الاول ابوي اذا زانت الاحوال معه يصير شعاره ” قرشك يخدمك ” .. بس اذا الدنيا مب ماشيه ع الكيف , أشتغل هو واذا الشغله يبي لها اكثر من شخص شغل باقي شعبه ( يعني شغلنا معه ) وغالبا ما يعجبني الوضع
بالنسبه للموضوع الثاني / يا أخي أعلامنا العربي مهزله , اتذكر قبل فتره صارت قضيه لمصري مقيم بالكويت وكتب الاعلام المصري عن القضيه وزاد الهرج الى ان وصل الموضوع لسب شعب الكويت وردت الصحف الكويتيه بالمثل,, مثل ما هو صاير الحين!
( أما حكم المحكمه أكثر من مهزله )
وشسمه والحياة حلوه
خخخخخخخخخخخخخخخخخخخخخخخخ
لا لا نزل لنا مقطع فيديو وافتح الماي خلنا نشوف انها ما انكسر وطلع الماي على شان نتأكد ان الدرس والشرح بذمة وضمير مشروح
وايش يضمن انك انت اللى ركبته يمكن جايب بنغلاديشي ب10 ريالات ومركب الحنفية وانت تقول انك انت >> شكلي بنجلد ..
بصراحة درس رائع لشباب المستقبل
ههههههههههههه
طيب لو سمحت مهندس ابراهيم ، بغرفتي في لمبة ( سبليت لايت ) والحديده طايحة وين احصلهم يبيعونها ؟؟
وياليت لو تنزل لي درس كيف تغيرها لاني لين اليوم اخلي ابوي الله يرجعه بالسلامة واحيانا اختي تركبها لي ، واختي بتتزوج قريب بعدين مين يغيرها لي ..
راح اكون شاكرة لك لو نزلت لي الدرس ..
شاكرين لحسن تعاونك ..
الله يعطيك العافية يابوخليل …
شغل ولا أحسن منه 100%
للأسف حالنا مزري في هالوقت الإعتماد على العمالة بنسبة مبالغ فيها ..
تصدق والله اني أعرف واحد يجيب عامل عشان يغير اللمبات في بيته
أنا مثلك أحب أخلص أشغالي بيدي كل ماكنت قادر على ذلك …
سلسلة جميلة , أتمنى أن لا تتوقف
جميلة هذه الهواية التي تزدهر مع كل شخص يخرب في بيتكم
.
لكني للأسف لا أحبها , ليس للسبب الترفع, و لكني أكره الأعمال اليدوية عموما, حتى في مختبر الفيزياء, كنت أحل المعادلات و الشباب يرتبون المعدات.
عندي أخوي يحب هالأعمال, بخبره يشوف هالدروس العالية الجودة, شو رايك تنزلها فيديو, عشان تكون أوضح
.
الله يعطيك العافية يابو خليل ..
عندي أضافه لو تسمح لي ..
أول شي وقت تركيب الخلاط و الشد عليه الواحد لازم يكون قادر انه يشد بيده بدون استخدام – اجستبل رنش – أو الزرادية يعني تشد على الجهتين بيدك لين يثبت وبعدين تشد بأقل من نص لفه بالرنش .. غير كذا ممكن انك تكسر الخلاط أو يصير عندك ليك – تسرب – ..
ثاني شي وقت وضع التيب الابيض – التفلون تيب – مفروض الواحد يتأكد من انه وضعه عكس عقارب الساعة عشان لما تشد ما ينفك عليك ..
بحكم أني تكنشن أحب اسوي كل شي بيدي .. و فعلا يابو مطلق أسعد لحظه بحياتي لما يناديني الوالد اصلح شي بالبيت .. عشان اسمع كم كلمه حلوه من الوالد و الوالدة ..
حركااات والله يا ابراهيم…
تعرف تزيـــن
انا مثلك ترا ، اعرف اغير كوالين باب
اعرف اصلح كهرباء
اعرف اصلح حمامات (وانت بكرامة)
اعرف ازرع واشتل لوووول
واعرف احرق مطابخ
بسم الله علي راعي السبع صنايع والبخت ضايع
والسبب الرئيسي لإبداعي في تلك الامور وهي
ان الحاجة ام الاختراع
لو مازينته انا ماحد مزينه
* ع فكره الزرادية الي تقول عليها اسمها ابو جلمبو موب زراديه
ولك جزيل الشكر….
احنا كده هنوقف حال السباكين
كان الله في عون السباكين
موضوع رائع اخي الكريم وتسلم يديك
.
.
.
حلووو … بس مالك بالسيارات
وين القصيبي عنك
العمل اليدوي ضروري
و الكثير من الأشياء يمكن التعامل معها
لكن الكهرب يبيلك تفكر مرتين قبل الفلسفه
والله حتى احنا نحتاج دورة في تصليح الاشياء ..
عن نفسي انا اشتغل كثير بالبيت ..
وانا صبغت الغرفة والصالة وحتى جزء من غرفة الوالد والوالدة..
.
.
قد طرحت وحدة من قريباتي فكرة دورات منزلية نسائية من هالنوع ..
لأن النساء عادة مايجيبون رجال من برا البيت عشان بس يركب لمبة ولا يصلح بزبوز ماء ..وتكلف فلوس وهي السالفة ما تسوى ..
لكن وين نلقى هالشي!
.
.
راح اسوي فورورد بعد إذنك على الموضوع
هلا فيك ابو خليل
والله من زمان عن المدونه جيت ولقيتها مقلوبه فوق تحت
تحديثات وحركات —> عقبال ماتصير شبكه
تجربه حلوه وخطوه جريئه
متابع
انا لدى مشكلة لدى حنفية مثل الموجودة فى الصورة ولكن شكلها مائل للجنب
وليست على استقامة واحدة اى ان الدى ركبها الله لاتسامحه علما باننى مشطب المطبخ جديد ولااستطيع تكسيرها فكيف الحل ارجو المساعدة
مضيعه بيتهم: من جد مضيعه ايش هل الشكوك والمغامرات اللي تبين تسوينها يالمضيعه ؟ (على فكره اسمها سبوت لايت)بيني وبينك بس لا حد يسمع
شكرا على المعلومه يابرهوم . اسف للجميع