وصلني ايميل اليوم يستنجد في المسلمين وأصحاب النخوه
وأنفاسه مقطوعه من هول ما أصابه وما علم به
إستجدى الهمم وطلب المعونه
لأن الأمر خطير وجد خطير
شباب الأمه على شفير الهاويه
وبناتها سوف تسبى عفتها
طلب إبلاغ المسؤولين بهذه المصيبه قبل أن تقع
أخبرنا بأن شرذمة الفساد قد أجتمعو .. وكشفو عن أنيابهم
أهل الزيغ والفساد وعباد الشهوه كما وصفهم صاحب الإيميل .. قد خططو لعظيم
يجب المبادره والوقفه الشعبيه من جميع المسلمين الشرفاء لوقف هذا الهجوم
ويجب على كل غيور على الدين ان يرسل خطابات الى الفاكس المباشر لمدير الهيئة الشيخ محمد المرشود
فأحسست بأننا إن لم نستجيب لندائه سوف نهلك
خصوصاً بعد ما قال
” الفزعه الفزعه و النخوه النخوه “
وبعد أن شمرت عن يدي .. وسليت سيفي .. ورميت عقالي
وشربت باور هورس (لزوم الفزعه)
حبيت أعرف ما أصابه
طلع الشئ اللي يطلب العون عليه
أنه (كما يقول) سوف يعرض فلم مناحي في المنطقه الشرقيه, وسوف يتم افتتاح سينما ..
بعدها نزلت أكمامي , ولبست عقالي ورجعت سيفي في غمده
طلع الموضوع كله بيعرضون فلم مناحي وبيفتحون سينما في المنطقه الشرقيه
يا خسارة الباور هورس 
—————–
طال النزاع بين التيارات في المملكه على موضوع السينما
وارسلت فيه الخطابات وقام المطالبون بالسينما “بالترزز” في كل القنوات وادّعو انهم يحبون الشعب السعودي
وقام الكثير من المعارضين بصوغ الخطب العصماء وتحدثو عن خطر السينما وأثرها في فساد الشعوب وبرضو ادّعو ان الهدف هو مصلحة الشعب السعودي
وطبعاً لا ننسى دس موضوع خصوصية الشعب السعودي بين هذا وهذا
وبالنسبه لي ..
والله لا همني لا رأي ذا ولا ذا
كلهم فاضيين وقاعدين يتبارزون ويصفون حساباتهم ..
وأحب أقول للسابق ذكرهم ( المطالبين والمعارضين )
أنتو يالمطالبين فيها .. يوم انكم تشدون حيلكم في مثل هالمواضيع وغيرها من سينما وقيادة المرأه للسياره وغيرها من توافه الأمور ..
كتبتوها وتكلمتو فيها من حبكم للشعب السعودي؟
لا والله تكذبون ان كان قلتو ايه..
اذا انكم تحبونه .. وينكم عن مشاكل الفقراء , ومشكلة العطاله , وغلاء الأسعار , وسوء النظام , وضعف الأمن وإنتشار الجريمه , وغيرها من الأمور اللي تمس المواطن وتزعجه ..
ولا علشان هالأمور ما تهم أعدائكم المطاوعه وما راح تزعجهم .. وما راح تقدرون تحشون روس العالم على الملتزمين .. فيها ؟
__
وانتو ياللي سالين سيفكم وتكفيركم وتفجيركم لمن يطالب بالسينما وقيادة المرأه ..
تحبون الشعب وخايفين عليه؟
طيب وينكم المشاكل اللي ذكرتها ؟
ولا تنتظرون التيار الثاني يطالب بشئ علشان تعارضونه …
واذا جينا على السينما ..
شادين حيلكم و باحين اصواتكم على هالموضوع من سنين وناسيين محلات الفديو اللي تبيع الشئ اللي مافيه سينما في العالم تقدر تعرضه
وتاركين خطر السيديات اللي تنباع على الشوارع وفي الأماكن العامه وعلى عينك يا تاجر وجهاراً نهاراً وفيها من المصائب والبلاوي ..
ورايحين وجايين على السينما , وتاركين باقي الأمور
وليه نروح بعيد؟ ليه ما تقومون على وزارة الإعلام اللي تعلن في جرايدها عن المحلات اللي تبيع الرسيفرات اللي تفتح ( كل شئ ) وانتو فاهمين وش اقصد بكل شئ
هذي الأشياء لو قسنا خطرها وقارنا بينها وبين السينما … فبتطلع السينما شريفه
إذن الموضوع ماهو موضوع خوف على الشعب و على مصلحته
بل ان النقاش في مثل هذه الأمور مجرد مبارزة بين هالتيارات .. والمواطن ضايع بينهم
واذا رجع لي الشور في هالأمور …
عندي ان السينما مثلها مثل غيرها … واللي يعرض فيها أنظف من اللي يعرض بالتلفزيون
لكن العالم مكبرين الموضوع
وعلشان ماحد يرتفع ضغطه من رأيي .. خلوني اوضح
أنا أقصد السينما اللي تقطع فيها تذكره وتروح تشتري لك بيبسي و بوب كورن وتقعد على كرسي وتشوف وتشوف الفلم على شاشه كبيره .. وقبل لا ينزل في السوق السعودي بشهرين .. وبس
إما ان كان السينما اللي يتكلمون عنها غير … فأنا مالي شغل فيها
وفتحوها ولا ما فتحوها … أنا ماعاد اهتم في روحتي لها .. يعني الموضوع ما يهمني
وانت يا راعي الإيميل ..
الفزعه الفزعه , النخوه النخوه
ذكرتني باللمبي .. وهو يقول الحب الحب , العشق العشق
كان بإمكانك تعبر عن اعتراضك بأسلوب أفضل ومافيه إثارة للعواطف , وترا اسلوب الفزعه ذا خلص من أيام خط البلده اللي مع مناحي يابو مناحي
وعذراً اذا صدر مني شئ .. بس الموضوع كان غاثني من زمان .. واليوم خالي متعب قلب المواجع
مسيك بالخير يابو عبدالرحمن
انت ماقلت لي يابو عبدالرحمن وش رأيك في موضوع السينما؟
اي والله ذكرتني باللمبي…………. ضحكتني بقوة
تحياتي
صح لسانك صح لسانك ..
بس سؤال : خط البلده خلّص
؟؟
صحيح , وش الفرق بين الي نشوفه في بعض القنوات الفضائية و السينما ؟ (والتيلفزيون في كل بيت). و الإنترنت !
و الله أول ماقريت الموضوع تذكرت اللمبي
ياذا السينما ..
شوف أخوي إبراهيم حنا لابد وضروري قبل كل شي جديد
نسوي حوسه وصجه ولجه همن يجي غصب عن خشوم الكل
ويومين ويصير الوضع عادي
لا وتلقى المعارضين هم أول من يمارسه
مانصير الشعب السعودي العريق لو ماسوينا هالشي
لذلك اركدوا وطنشوا الموضوع .. وروحوا تفرجوا على الفيلم العظيم والشخصيه الفظيعه مناحي
ولاتسون البوب كورن وكيس بلاستيك تحسباً لو لاعت كبودكم
الله يخلي ام بي سي قروب والشوتايم
لية تجهز الدواء قبل الفلعه
اجل فلم طلع هااااا
طيب وين الفلم بام الساهك
او شارع بوحدرية 
استغفر الله العظيم سينما وبالسعودية بتحصل البزران قبلك مرتزين او احتمال اخر يقول ان الهيئة واقفين عن الباب وبيرجعونك ..
ما ادري لية معطين السينما اكبر من حجمها ترى مانبي السينما اذا كل الافلام سعودية ” لان السعوديين مع احترامي للبعض ثقال دم ” نبي زي سينما البحرين والدول المجاورة
بدل ما تحضر سينما بالسعودية وتحصل الجيران كلهم امسك الجسر البحرين والله يخلي سينما السيف والدانة بس
وعااااااااااشت مملكة البحرين
وش هالأسلوب المرعب والله لو جايني إيميل كذا
كان ما فتحته أخاف تطلع لي قنبلة وإلا شيء
بعدين وش فيها لو فتحت سينما يعني دامهم يتقيدون بضوابط
معينة بخصوص عرض الأفلام وغيره
بس أهم شيء أهم شيءلا يعرضون افلام سعودية كوميدية
عندنا الكوميديا فاهمينها غلط الشباب
ايو والله انك صادق انشغلنا عن امور اهم بشى تافه ….والسؤال؟؟؟لماذا تطرح هذه الامور في هذا الوقت هل الهدف اشغال المجتمع عن أمور اخرى ….ام ماذا؟؟
أجل الموضوع سنيما !!
يابو مطلق صدقت فرقين يتحاربون و تاركين هموم الناس .. لا والأدهى يشغلون الناس باشياء مالها لزمة .. هذا يبي يغيضهم و هذا يبي يخرب عليهم .. و ضنعا بينهم ..
تعرف أنا أقتنعت بكلامك يوم تقول ما راح أحضر سنيما بالسعودية .. لانها بتصير تصفيق و تصفيق و تقشير حب ( ورمي المخلفات على اللي قدامك !)..
تدري من الاشياء اللي أتوقع تصير .. نتيجة لمثل هذي الايميلات الحماسية يصير شي قريب لحادثة مسرح اليمامة .. طق و تكبير و صياح .. و عسكر يطلقون نار و اللي مايشتري يتفرج ..
بقي نقطة أخيرة أحيي فيك أخوي ذكر الباور هورس .. أحسن مشروب طاقه و لو اني ابي افتك من ادمانه
دائما الناس يحاربوا الجديد.. مع ان موضوع السينما أبدا أبداً أبداً مو جديد! حتى بنغلاديش فيها سينما ياناس
نفس الكلام اللي بيقولوه دحين كانوا يقولوه أيام الساتلايت وانه حرام ورجس من عمل الشيطان وفي النهاية نلاقي قنوات دينية!!! طيب فين راح الرجس اللي يقولوا عليه؟
ياسر الغسلان : الشكر الشكر
——————
نوف : هو ماخلص بمعنى انه انتهى … انا اقصد انه ماعاد فيه راعين الفزعه اللي على عماها … وترا خط البلده هو ميت من زمان … ومن باب حقوق الانسان مفروض يا يغيرون هالباصات يا شوفون لهم دبره ..
——————
بنت المطر : وهذا حالنا من أبيض وأسود … وهذا ان دل فيدل على ان العقلية هي نفسها … وصدقيني لو يقولون لهم طيب بنفتح دور لعرض الأفلام المختاره .. بيقولون ايه اذا كذا عادي … بس سينما لا
——————
مضيعه بيتهم : بل أم الساهك … قديمه من جد
وتحياتي من هنا الى أهالي حزم أم الساهك الكرام 
وعلى قولتك .. اذا فتحت السينما ماراح يجيها في البداية الا اللي يحبون الاستههبال والتصفيق … والباقي بيروحون البحرين … على الأقل فيها نظام
——————
روشانا : ايواه كذا التفكير … اهم شئ الضوابط .. المشكله ماهي في المبنى والكراسي والشاشه … زي مافيه محلات فديو والى الآن فيه افلام نازله من سنين والى الآن مانزلت في السوق بسبب الضوابط … هذا والتحكم في السينما راح يكون اسهل من محلات الفديو …
لكن هذا الشئ بيصير وبيفكرون في الموضوع بهذا الشكل لما ما تكون السالفه مبارزه وتصفية حساب ..
—————
عبدالله الاسمري : ممكن يكون بهذا السبب … لأن الشعوب العربيه اثبتت انها بسهوله يتم تشتيت ذهنها … فاذا ركزو على موضوع افتح لهم اي سالفه وقولهم ” بص هناك , ايه ده؟ ” خلاص ينسون السالفه الأولى
—————
طلعت راعي باور هورس بعد … اليوم باور هورس وبكره بلياردو .. الله يستر منك بس 
عبدالله القحطاني : هلا والله بالحبيب
وزي ما قلت اخوي عبدالله الشعب ضاع بينهم
—————
asma : لو انهم يفكرون بالسبق في الأمور .. بحيث انهم هم من يبدون فيها ويخلونها على مزاجهم .. ماكان صار هالشئ .. بل هم يحاولون يعارضون وفي الأخير يحاولون يكيفون نفسهم على الشئ الجديد … ومثلها مثل ماذكرتي الستلايت ..
بس انا الى الآن أقول ان الستلايت رجس من عمل … ولولاه كان ماشفنا هالأشكال اللي في السوق
ياذي التفاهة
هذا الإيميل فكرني بنوع مشابه تلاقي طلب حلفان ورمي أشمغة وفي الأخر دعوة أنشرها وإلا مافيك خير ولا إنت من أهل الخير وتراها حجة يوم القيامة وإنت حر ما بتنقص إلا حسناتك يا محرووووم ..
طيب طيب ممكن الأخ عنده علم الغيب ..
المهم تسلم تسلم الموضوع حلو حلو
عادي جدا تشوف هذي الإنتقادات كثير وخصوصا من شعبنا الواعي
ومابعد اعتراضهم ( قديما ) اللي وصل لدرجة التكفير على .. مركب الشيطان ( السيكل ) و عجوز الجن ( آله كانت تستخدم للمراسلة بين امراء المناطق والملك
يقولون
شر البلية ما يضحك
بالفعل العالم يتنافس على المقدمة
ونحن بنتضارب
مين فينا -أخيس- واحد
يعني السينما صارت مشكلة المشاكل
ياريت يفتحوها عشان نلم نفسنا شوية من بيوت الجيران
مشي حالك
حالك يمشي
على أساس إن السينما وسواقة المرأة هيا بتكون سبب كل مشاكلنا اللي مغيبينها وينتظرون شماعه يعلقون عليها المشاكل ويقولون :
شفتو ؟ قلنا لكم إنها بتسوي كذا وكذا
فعلاً توقفو على التفاهه ونسيو الأهم
ترى الآن لو تلاحظ اللي بيسوي راعي رأي ومثقف
قال أنا ليبرالي وكل ما قال واحد الدين مسكه تهزئ وترقية وقلة حيا
و المشكلة كلهم فاهمين الموضوع غلط ،، همهم خالف تعرف
تسلم عالتدوينة
قبل يومين جالسين مع الاهل ونتكلم في هاذي السالفه
جات ستي الله يحفظها تقول هذولوا عملوازي البزر لمن تمنعوا
يأكل الحلاوه في البيت يخرج بره ويأكلها ولاكانك عامل عليه حصار
في البيت
الحكايه اخذت اكبر من حجهما اش الفرق بينها وبين القنوات وكل شي
على بياض اهم شي الضوابط وانتهت الحكايه ومااتوقع انه سينما عندنا
وراح تجبلك الفليم كامل هذا لو فكرت
هل اصبحت السينما بالنسبة للبعض هي القشة التي ستقصم ظهر البعير، الان لدينا المئات من القنوات التي تعرض في الغالب كل ما هو غث وتافه، هذا غير آلالاف من عشاق السينما يتجشمون عناء المغادرة للبحرين من اجل السينما،اليس من الأفضل عمل صالات سينما في مختلف مدن المملكة على أن توضع ضوابط معينة يلزم بها اصحاب الصالات من حيث نوعية الافلام المعروضة فتمنع الأفلام السطحية والافلام التي تعتمد على التهريج وتحذف اللقطات المخلة التي لا تخدم النص،على فكرة الا يعتبر الاي ماكس نوع من انواع السينما لماذا سمح به منذ عدة سنوات في الخبر في مركز (سايتك) بينما السينما لازالت من الممنوعات؟؟
السلام عليكم
شكراً يا استاذ (عمه) على هاالتدوينه الجميله
المهم بغض النظر عن صراع (الحلف الشمالي) (المتعصب) مع بعضه البعض
حول جميع توافه الامور اللي تتعلق بالشعب السعودي واثارتها بشكل عاطفي
والشعب دايم وهم مع المثل المعروف ( مع الخيل ياشقرا)
انا ارى ان كل هذه الاثاره بين هذاذين التيارين
تتبع سياسة
كرة القدم……….
المزاينات…………
مسابقات الشعر……..
والقائمه تطول بالامور اللي تشغل اللي مع الخيل ياشقرا
بيدك خيار الحضور من عدمه ..
أنا ضد السينما عموماً في أي مكان وقرار الخيار بيدك من الحضور والتواجد بها عموماً ..
ولا نحتاج أن يدس هذا الموضوع في ضجة الإعلام التي لا تجد إلا قشور المشاكل الغبية ..
أتفق معك .. وحرب الفريقين (الفاضيين)
السلام عليكم …
انا حبيت اعلق عالموضوع لانه من زمان حارني…
انا دائما ومن زمان اقول منهو الغبي اللي منع السينما في السعوديه وفتح علينا ابواب ماتصكرت… اللي منع السينما مايدري ان كل البيوت فيها قنوات الشوتايم على الاقل لاحظا على الاقل … منع السينما وفتح علينا باب البحرين ودبي والخمر والنغربيات…! لين صارت رجول شبابنا سهله ومنطلقه لهذيك الاماكن واذا سالته عن السبب قال انا بروح للسينما وبعدها معاد تقدر توقف في وجهه…
ليه منعها واحنا نشوف في قنواتنا مثل ماتفضل الخ ماالسينما اشرف منه… يعني خايف على عقولهم ومو خايف على اخلاقياتهم…
طيب وش المانع ماتحطون سينما تحت ضوابط وقيود وياعمي محد قالكم اعرضو افلام اباحيه ولا غيرها اعرضو افلام وقطعو زي ماتبون بس عيالنا لايروحون لهذيك الاماكن اللي سحرتهم وضيعتهم…
لا مانخلي عيالنا عندنا ونوفر لهم اللي يبونه تحت مراقبتنا.. اكيد كل شي غريب عالمجتمع راح يسبب فوضى وازعاج اول مايوضع لكن ماراح ياخذ 5 سنوات الا والناس تاقلمو عليه واعتادوا… ليه !! خايفين ؟ وش فادنا الخوف والانغلاق وكل شي ممنوع؟؟؟ سؤال صريح؟
اكبر مروجين المخدرات بالعالم العربي سعوديين…!
اكبر قنوات الفضائيه مثل ال بي سي والفيوتشر وروتانا ..الخ وغيرها سعوديين يملاك ياشركاء!!!
اكبر شباب بالخارج داج وضايع وبنات منفلاتات عرب سعودديين بحكم سفراتي.!!
اكبر مرتادين المراقص والكزنوهات سعوديين !!
وبعدين .. انغلاقكم وتخوفكم ايش جاب لنا!!
اكبر نسبة عطاله سعوديين..!
اكبر نسبة فقر في بلد غني سعوديين؟؟ من وين جانا هذا كله؟
ويعني اذا منعتو السينما بينصلح حال الشباب والا بيدحدرون اكثر؟ سؤال ياليت من منع السينما يسال نفسه وشوف كم من الايجابيات اللي راح ناخها لوفتحت عندنا سينما محترمه وكم من السلبيات اللي راح نتفادها ؟؟؟
واقول للي متروع الضعيف والجاهل عفوا اللي يبي الفزعه روح دور الفزعه على امور تستاهل وتهم الامه مثل التعليم والفقر والعطاله ودعوات التنصير اللي انتشرت بدال ماترتاع عشان السينما وتتستنجد بجهل وعدم دراسة الموضوع…
شاكره لك اخوي ابراهيم
ام زيد
أنا ضد السينما عموماً في أي مكان وقرار الخيار بيدك من الحضور والتواجد بها عموماً ..
ولا نحتاج أن يدس هذا الموضوع في ضجة الإعلام التي لا تجد إلا قشور المشاكل الغبية
صح لسانك يا ابراهيم
وعلا شانك ع هالكلام السنع <== تماشياً مع جو مناحي
كلامك ميه ميه وما ينزاد عليه
للاسف اننا ننشغل بالقشور ونحاول نخلق الف شعبه عشان بس نناقر ببعض !
الله لا يفزَعنا بشر
انا معك في كلمك لكن لمذلا تنظر اليها من منظورك انت فقط ترى التقدم في السينما ولكن هنا يقع السؤال الذي قيمته مليون يال هل نحن جاهزين لطرح افكرانا في السينما هل تتقوع اننا سنعبر انا لا ارى ذلك ارى انا سوف نستورد الثقفات الغربية والتفكير المتحرر الذي لا ينسب مجتمعنا لمذا لا نقف وقفة جدية ونرى نحن لدينا التلفز هل راينا اعمال سعودية تمس المجتمع خلال 10 سنوات لا اظن ذلك بال العكس جمعها افكار لا تمس لوقعنا بصلة نحن ندري فشلنا ليس لدينا هل تعتقد ان مثلا بنات الرياض فليم ناجح انا لا اظن ذللك بالعكس نحن نتحدث الطبقة المخملية في المجتمع وعن همومها اقولك لا نرى الشارع في السينما لاننا ببساطة الشارع لا يملك همزة الوصل ؟!!!!!!!
وامل انتكون انت همزة الوصل!!!!
[...] مازلنا مبتدئين في مجال السينما و الأفلام و مازلنا نناقش حكمها الشرعي! لكن ماذا عن تبنّي الأفكار الشبابية [...]
أعتقد أنك تظلم جهود المصلحين من ناحية المشاكل اللي ذكرت ، أتمنى أن تقرأ لمعارضي السينما الواقعيين حتى تتفهم وجهات النظر ؛ مسألة الضوابط لاتحل مشكلة المترددين على البحرين ؛ تأمل منافسة القنوات المحلية للمفتوحة لترى أنه لاقيمة للضوابط وأن المطالبات هي لسينما مفتوحة تتعدد آثارها السلبية !
أستاذي الرائع ابراهيم
السلام عليكم
حقيقة و ليست مجاملة انا من اشد الناس متابعة لمواضيعك لما المس فيها من صدق و بديهة و عدم تزلف و صف كلام
لكني و بحكم عيشي في الغرب لسنوات .. دعني أحلل لك منظور السينما الغربي .. فالمقصود بالسينما هناك ليس مشاهدة الأفلام بقدر ماهي مجال للإلتقاء بالأصحاب و الأحباب اذا هي مكان اجتماعي .. حسب الأحصاءات و القراءات يتبين لي انها مجرد “استراحة على طريق الثمامة” بفكر غربي .. لكني دعني ابين لك جانب آخر و هو المظلم في هذه القضية و هو انها تحولت الى مكان للإلتقاء و المواعدة مع الفتيات “ديتنق” أكثر منه مكان لمشاهدة الأفلام .. و انا أكاد اجزم ان من ينادي به من اصحاب التحرر و الخوف على الشعب هم يقصدون التحرر للمجتمع عن طريق هذا الباب .. مما يضحك ان احدهم قال ضعوا عليه رقابة شرعية !!! و هذا دليل ان المقصد ليس ما يعرض بل الجو العام .. كثير من الفتيات في الغرب لا تلتقي مع اصحابها الا في السينما .. اذا هي دار شر .. و استغرب من الئك الذين يسطحون المفهوم و كأنهم لايدرون ان وراء الأكمة ما و راءها ..
و شكرا جزيلا
أنا دائما اقرأ مدوناتك وتعجبني بس مافيني احرك اصابعي على الكي بورد واكتب تعليق بس صرااااحه الموضوع مسكت وخلاني غصب اكتب
منجد في ناس كثير في مجتمعنا تفكيرهم سطحي مايهمهم إلا توافه الأمور
عشت ياأبو خليل
نعم الفزعه الفزعه
كلااااااااااامك صح…صح..صح