قبل فتره كنت اتكلم مع واحد من الشباب ممن اثق بتفكيرهم وفلسفتهم الخاصه 
وكنا نسولف عن الشعب السعودي ومشاكله وطريقة تعامله ..
فقالي , تدري وش مشكلتنا كشعب؟
سئلته عن مشكلتنا ..
فقالي .. مشكلتنا انه عندنا هاجس المرجله, وهالهاجس لاعب فينا لعب ..
كل تصرف او كلمة, نخلي له علاقة بالمرجله ..
وهذا الشئ لفت انتباهي الى موضوع المرجله .. وكيف ان اغلب التصرفات السيئه والهمجيه اللي تصدر من بعض شبابنا سببها سوء الفهم لمعنى المرجله ..
——————-
- البعض يرفض انه يجلس مع امه على نفس الصحن , ليس لأنه يقتدي بالحسن البصري ولا يريد تسبق يده إلى شيء وأمه تتمنى هذا الشيء .. ولكنه لا يأكل معها على نفس الصحن لأنه يظن بأن هذا التصرف يخدش رجولته.
- ترى ماهو من الرجوله ان الواحد ما يركب زوجته جمبه في السياره.
- ترى ماهو من الرجوله انك ماتمشي مع زوجتك في الأسواق وتخليها تمشي وراك بعشره متر.
- ترى ماهو من المرجله انك اذا بغيت تنادي زوجتك او امك او اختك في السوق تناديها بقولك لها ” هيه “ولا تصفر !! ياخي ماتبي تقول اسمها, قولها يا أم فلان.
- ماهو من المرجله ان الواحد يرفع صوته على اهله في السوق ولا يعصب عليهم قدام العالم ويحرجهم
- ترى ماهو من المرجله ان الانسان يكون وجهه اشعث أغبر, وملابسه كأنها خريطة بسبة المرق اللي تعشاه البارح.
- علك على الصباح يخدش الرجوله و يعدل ريحة فمك , أحسن من رجوله و ريحة فم تشق الخشم وتذوب الوجه.
- ترى عدم التزامك بالصف والترتيب اسمه همجيه , وان كان احد قالك انها مرجله فتراه غشك.
- ترى اللي يتهاوش مع الذبان اللي على خشمه ومع اللي يمر في الشارع ويطالع فيه يسمونه مريض نفسي , وهناك فرق بين المريض النفسي والرجال الأقشر.
- المرجله اللي تزيد بطول الشنب وتقصر بقصره , ترا مالها سنع
- بعض الناس اذا بغى يأكل ولده شئ ,و لا بغاه يشرب عصير , ولا يآخذ الدواء .. قاله خلك رجااااااااال , والرجال يآكل لحم ورز ما يآكل كاكاو .. وهذا المرجله ذبحتنا الى ان صرنا مانلقى مقاسنا في السوق
- اذا ولدك بغى يلبس بنطلون ولا شورت وانت مانت راغب انها يلبسها .. قوله لا وبس .. ولا تقوله ترا الرجال مايلبس هالأشياء .. علشان لا يطلع الشارع ويظن انه هو الرجال الوحيد.
- ما للرجوله اي دخل في ان الرجال يسجل اسم زوجته في الجوال أبو صعفق !!
- اذا الواحد كلمته زوجته وهو في مجلس ورد عليها , وقالها ان شاء الله و لا ابشري ماهو عيب .. ماهو لازم يبين نفسه حمش وبقولها خلصنااااا انتهينااااااا .. فمن المرجله ان الشخص يحشم محارمه قدام الناس.
- ترى أكل الفقع و الإقط والضبان والجرابيع والمندي مايزيد هرمون الذكوره ولا ينقصه.
- هناك فرق كبير بين المرجله والهمجيه والدفاشه والجلافه
واللسته تطول ..
وليعلم كل الرجال بأنه لا يوجد شئ اسمه ” منيو للمرجله ”
يعني المرجله مالها أي مرجع …
فكل منطقه لهم عاداتهم وتقاليدهم ونظرتهم لمفهوم المرجله ..
و لا يعني عدم التزام اي شخص بهذا المفهوم بأنه خرج من دائرة الرجوله ..
وانا من وجهة نظري .. يجب الحرص على الأخلاق .. فهي من يحدد معدن الرجال..
فكل السابق ذكره من نقاط , هي مجرد مظاهر حرص عليها البعض ليشبع هوسه وهوس الشعب في مفهوم المرجله..
ولكن الرجال هم أخلاق وصفات وأفعال ..
ويكفينا سيرة الرسول الكريم صلى الله عليه وسلم
فمنه نعرف معنى الكرم والشجاعه و الصدق و التواضع و العزة وغيرها من الأخلاق والصفات الكريمه والتي نحتاجها اليوم أكثر من حاجاتنا الى ” مظاهر “ المرجله.
وشكراً لأبو فهاد .. صاحب هذه النظريه
“المرجله اللي تزيد بطول الشنب وتقصر بقصره , ترا مالها سنع”
شكلك ناويها ..
الله يعطيك العافية .. كلامك 100%
والاخس من كذا ان فيه شغلات حرام .. لكن الواحد يجي يقول لولده الرجال مايسوي كذا ويترك الاصل وهو الحكم
” ترى أكل الفقع و الإقط والضبان والجرابيع والمندي مايزيد هرمون الذكوره ولا ينقصه.”
تونا مخلصين اختبار أحياء
وبصراحه الرجال مواقف ..
شكراً لك على التدوينة الرائعه ^_*
((علك على الصباح يخدش الرجوله و يعدل ريحة فمك , أحسن من رجوله و ريحة فم تشق الخشم وتذوب الوجه.))
والله ذكرتني بواحد معاي في المدرسة ^^
بسببه صرت كل يوم لمن أروح المدرسة أخلي خشمي في البيت
لأن من جد الريحة توصل للنخاع
((المرجله اللي تزيد بطول الشنب وتقصر بقصره , ترا مالها سنع))
هذي تذكرني بناس
إذا واحد حلق شنبة خلاص كأنه أشرك مع الله عز وجل
وطوال اليوم ياخكري ياحرمة ياماأدري إيش …إلخ
على العموم مشكور أخوي برهوم<<<<<مسوي ميانه
اسمح لي يابو خليل أزيد على المرجلة مفهوم الكول !!
لأني أشوفهم زي بعض ..
تحياتي لك و لأبو فهاد ..
صح لســــانك
أجمل تحية ابراهيم.. بعض النقاط اللي ذكرتها عفى عليها الدهر ومن الصعب تصديق أنه هناك من لايزال يعمل بها، خصوصا النقطة الأولى.
أيضا مشاكل الشعب السعودي في العموم كثيرة وهذه واحدة بس ( ولكني صراحة أتفق معك بأن أهم مشاكلنا كشعب هي أخلاقية في المقام الأول، ومسألة المرجلة هي أحدها)…
الله يحفظك أخي ابراهيم
متابع لك دائما، دمت بخير
كلام رائع وعين العقل والله
أكثر شي استغربت منه [ # ترى ماهو من الرجوله ان الواحد ما يركب زوجته جمبه في السياره. ]
شفتهم بعيوني
المشكلة بعض الناس تؤمن بالعادات الغريبة هذي وكأنها أشياء مسلّم بها
ويتوارثها الأجيال للأسف
بس أعتقد الجيل الجديد أوعى من اللي قبله في هذي المسائل
ولا ايش رأيكم ؟
ما للرجوله اي دخل في ان الرجال يسجل اسم زوجته في الجوال أبو صعفق !!
ههههههههههههههههههههههههههه عليك أسامي يا برهوم خخخ
من جد هل إلى دا الوقت فيه زي الحالات؟ يعني المرجلة بس من برة! على كدا كل رجال ماليزيا حريم بالنسبة للي قلت عليهم خخخ
مسفر : لا انا من يوم عرفت الدنيا وانا مكينه رقم 1 .. لا أزيد ولا أنقص .. لأنه اذا خففته اكثر تنتفخ براطمي .. جسمي غريب وعليه حركات مدري وش تبي .. مشعل يقولي يوم خففت شنبي … ” دا واااايش أبو خليل ”
——————–
CrEaTiVe : تدرسون عن الفقع؟ عز الله أفلحتو
يالله بالتوفيق ان شاء الله … الى الآن الأحياء تدرسون أسماء الخلايا وأجزائها؟ كانهم بيخرجونكم اخصائين مختبر !!
——————–
عبدالله القحطاني : الموضوعين الجايه بتكون عن الكول وعن الأنوثه واعادة التعريف … مشكلتي يابو عابد اني شايل حمل تعديل هذا العالم
ههههههه
——————–
Driver : بشوف اذا كتبت عن الحريم بتقولين صح الله لسانك ولا لا
——————–
خالد العيسى : هلا ابو وليد … نعم يا خالد اغلب مشاكلنا اشياء مترسبه في عقولنا وفاهمينها غلط … وقاعدين نطبق اشياء غلط فاهمينها غلط بوقت غلط … وتسعدني متابعتك يا صديقي الصدوق ..
للحين تمشي مع ابو سالم؟
——————–
asma Qadah : اتعمد اختيار الاسامي المهجوره علشان لحد يفهمني غلط
وصدقيني الى الآن فيه ناس بهالعقليات … لأنهم تربو على هالأشياء وهم ماينلامون … اللي ينلام الأب اللي ماعرف يفرق بين الظواهر والعادات والتربيه …
ونعم فيه ناس في السعوديه ينظرون الى أن اللي ماهو زيهم ماهو رجال … يعني زي امريكا … يامعاي يا ضدي
جلال : تلقاه من الناس اللي يرون بتحريم معجون الأسنان
وتمون ياجلال تمون 
————————
أفياء : أنا اتوقع ان بداية هذي الظاهره … ان سيارة واحد كانت ضيقه .. والأم تركب ورى وتقدم الكرسي اللي جمب السايق علشان توسع على عمرها … والناس فهمو غلط
ماهو من المرجله ان الواحد يرفع صوته على اهله في السوق ولا يعصب عليهم قدام العالم ويحرجهم
أفتكر مرة في السوق واحد زعق على أهله زعيق أنا انفجعت منه وخفت وسبت المحل << كان يقلهم يلا بسرعة امشو
بصراحة مرة أسلوب غبي جدا في التعامل .. وكل مرة يتعامل بدا الاسلوب ينقص في نظر اهله زيادة ..
بس مين الي يفهم ؟
كفيت ووفيت … صدقت والله … وعلى طاري لبس الجينز مو من الرجوله … انا وصلت مرحله اني اذا لبست بدله اصلي في مسجد ما احد يعرفني فيه … لان جماعة المسجد ينظرولك نظرة وكانك فسقت الى درجة انهم ما يردون السلام …. عالم غريبة!!!!
صح الرجوله فعل قبل ماتكون تصرفات في مواقف بايخه ,
والله موتني ضحك بس هذا الحال
كلماتك هنا أقل ما يقال عنها مرجع..
يعني إلي عنده أي إشكاليه في مفهوم الرجولة يدخل لهذي التدوينة واكيد بيفهم..
كلام ملخص وفيله من الرجولة الكثير.. أقلها الاعتراف بأن هذي التصرفات لا تمت للرجولة بصلة..
الله يجزيك خير..
ياالله يالله يالله ..
هذه تدوينة تستحق أن تطبع وتوزع على كافة المتزوجين والعازبين المقبلين .. أو كما تقول مسك تكون مرجعاً ..
لا نريد رجالاً بهكذا مرجلة
مشكلة والله ..
والله الحمدلله ما فينا دي الصفات لاكن حبيبي الفقره الي شدت انتباهي موضوع اللبان والله انا شايف لو خليتها انو الواحد يفرش اسنانو او يتسوك كانت احسن لانو برضو اللبان بدون ما تفرش اسنانك وصاخه في نظري بس يمكن على قول الناس وصاخه عن وصاخه تفرق لووول يعطيك العافيه على الموضوع الجميل
((ولكن الرجال هم أخلاق وصفات وأفعال ..
ويكفينا سيرة الرسول الكريم صلى الله عليه وسلم
فمنه نعرف معنى الكرم والشجاعه و الصدق و التواضع و العزة وغيرها من الأخلاق والصفات الكريمه والتي نحتاجها اليوم أكثر من حاجاتنا الى ” مظاهر “ المرجله))
كلم أكثر من رائع – كل الكلام لكن هذا اللي شدني – .
” فتجده مع أهله يرعد ويزبد أما غيرهم طيب وودود وووووو طيب يعني هذولا بشر وأهلك لأ ؟؟؟
” خيركم خيركم لأهله وأنا خيركم لأهلي ” هذا قول من كان في المعركة يحتمي به الرجال أما الآن فالبعض ينطبق عليهم ” أسد علي وفي الحروب ….. زرافة
السلام عليكم ..
كيف حالك يا إبراهيم .. هي بس المرجلة يبي لها إعادة تعريف، شغلات كثير بعد لازم نعيد تعريفها ..
صح لسانك ..
يتم توزيعها على كل مواطن و مقيم و مسؤول حكومي و غير مسؤول حكومي ..
أشياء كثيرة تتعلق بالعادات يبغالها إعادة ضبط ..
مثل اسم البنت /الأم .
بس حقيقي ما أتصور إن فعلاً فيه ناس لحد هالوقت مايآكلون وايا أمهم أو زوجتهم في صحن واحد بحجة المرجلة..
جميل إنك فتحت الموضوع لأني متضايقة من زميلة لي مجتمعها متقدم في كل شيء إلا في جانب العادات الي ماأنزل الله بها من سلطان، أفكر ايش دور الشباب المثقف في تصحيح وضع المجتمع؟!
علوم المرجلة هذي مستوحاه من العصر الحجري الحمد لله والشكر
السلآم عليكم
مسآء // صبآح … الخير
صدقت يآ أبو خليل.. هذي ظوآهر منتشره وفيه نآس متمسكين فيهآ ، وإذآ مآ سويتهآ مآعآدك منهم ولآ يعرفونك ، وهي للأسف أخطآء!!
ومشكور وننتظر مدونتك الجآيه عن ( الكول والأنوثه ) والله يكون بعونك
و انت صاج!!
اذا ولدك بغى يلبس بنطلون ولا شورت وانت مانت راغب انها يلبسها .. قوله لا وبس .. ولا تقوله ترا الرجال مايلبس هالأشياء .. علشان لا يطلع الشارع ويظن انه هو الرجال الوحيد.
——
كلام عين العقل
تدوينة رائعه يابو خليل
ترى ماهو من المرجله ان الانسان يكون وجهه اشعث أغبر, وملابسه كأنها خريطة بسبة المرق اللي تعشاه البارح.
هههههههههههههههههههههه………وش دراك أنه شارب مرق كل واحد يشوف الناس بعين طبعه……وكل الكلام اللي قلته صح بس أتوقع أن الشى هذا هم متشربينه من الاباء والاجداد فيظنون أن التمسك به مرجلة …..وهذا الشئ في الغالب في فئة معينة من المجتمع وأنت تعرفهم
والله خطير يا برهوم
السلام عليكم أبو خليل :
والولد المسكين ما يدري وش يبي وما يقدر يقوله يعني ايش لأن الاب الحبوب يقول له الرجّال يفهمها وهي طايره.
أغرب شيئ في موضوع المرجلة أنه الكل يطالب فيها ولايحاول يعرفها قبل لا يحاول يطالب فيها خصوصاً الأب مع عياله تلقى الاب يقول للولد من هو صغير أذا سوى شيئ ما يعجبه خلك رجال
ويقعد حياته كلها وهو ما يدري وشي المرجلة والمصيبة أيش ؟؟؟؟؟؟
أن هذا الولد بعد كم سنة يصير أبو ويبداء يقول لولده الصغنن أنتبه ياولد خلك رجال
اوووووووووف والله انك خطير
كل اللي قلتة جرنتي
صحيح ان المرجلة ماهكذا بس الشباب يقلدون بعدين حتى مرات يعتقدون ان الريال لازم ينفخ صدره لما يمشي عشان يطلع شخصية قدام العالم
الرجولة موقف
ممكن أضيف
ماهو من الرجولة انك تركب قدام لمن أبوك أو أخوك الثاني يسوق السيارة وأمك أو أختك الكبيرة تركب ورا
شخصيا أعتبرها من قلة الذوق وعدم احترام الكبير, وما في احد يكبر على أمه !
بالنسبة للشنب فكلا من القطة والفأر والأسد يمتلكون شنبات ترا ومالها علاقة بالرجولة
حلوة حكاية اللحم والكاكاو
ههههههههههههههههه
أمس كنت في مطعم البيك فشفت واحد يدف ولده بين الناس ويبغاه ياخذ طلبه قبل الناس ولما الولد يقله لسه الرقم ماجا يقول الاب :عطه الورقه يالتعبان
يا سلام على المرجلة
والله كان نفسي أخمس وجهه بمخمس بس تعوذت من إبليس وقلت هذا واحد ماهمه ولده
والله ممكن يمرمط بكرامتي التراب ويسمعني كلام من ينقال
خذ المسحب قبل ما تتسحب
ماذا تتوقع من مجتمع يعشق عاداته وتقاليده ويضعها في اطار من التقديس وكأنها تشريع ديني والويل لمن يتجرأوينتقدها أو يخالفها،حتى لو كانت مخالفة لأوامر الدين الإسلامي
ولو ان الرد متأخر ..
لكن حبيت اعلق على نقطة ( المرجلة ) ..
اثنين بالعمل ( بالاول اسأل الله ان يهديهم )
ماخذين المرجلة بالمقلوب
تحصله لن تكلم رجااااال ،، ومشيته مشية رجال ،، وحركاته حركات رجال ،، وهياطه هياااط رجال ،، ومهاوشة رجاال ،، وبذئ لسان رجال ،، ومغازلة البنات رجاااال ،، والحش في خلق الله رجال ،، والعصبية القبلية رجااااااال ،، والدخان في الاسياب رجاااال ،، وتخريب الاجهزة والمكاتب رجااااال << كلها تصب في قربة المرجلة – على حد فهمهم
ولكن اذا بغيته بالصلاة ما لقيت رجااال ،، واذا بغيته بالكلمة الطيبة مالقيت رجال ،، وإلا بغيته بالصلح مالقيت رجال ،، وإلا بغيته يغار على عرض الناس مالقيت رجااال ،، وإلا بغيته ينشر الخير مالقيت رجال ،، وإلا بغيته بلبس متحشم مالقيت رجال ،،
اجل وش هي المرجله بنظر هؤلاء ..
بئس والله من مرجلة اذا كانت هذه مبادئنا ،،
بنظري الرجال بلا صلاة ماهوب رجال ،، والحرمة ارجل منه دامها محافظه علي دينها وصلاتها..
كل اللي قلته والله هالحاصل بالعمل ،،
شي يحير ،،
اسأل الله السلامة
وان يمن علينا وعليهم بالمرجلة الصحيحة : مرجلة عمر بن الخطاب وامثاله من التابعين ومن تبعهم .
[...] من أجل.. By أسامة دائما ما كنت أود التحدث عن هذا الموضوع، و ها قد جاءت الفرصة… لكني سأكتفي بإضافة اقتباس [...]
مشكلة المجتمع الخليجي العادات والتقاليد للي بدأت في زمن جد ابو جد جد جد جدي وإللي لليوم الناس ما تعبت نفسها سوية وتشوف اذا كانت هالعادات تصلح بالمنطق او لا..
اللله عليك صح لسانك
وسلمت يداك
وياليت رجالنا يصيروا رجال صح
“اذا ولدك بغى يلبس بنطلون ولا شورت وانت مانت راغب انها يلبسها .. قوله لا وبس .. ولا تقوله ترا الرجال مايلبس هالأشياء .. علشان لا يطلع الشارع ويظن انه هو الرجال الوحيد.”
كتبت في قوقل “المرجلة ” وظهر لي من بين النتائج التالي :
”
“المرجلة ” صفة الرّجال الرّجال, أصحاب القيم والمبادئ والضمير الحي ووقفة عز شامخة , “المرجلة ” بأن تقف وقفة حق بوجه الظلم والاستبداد والطغيان ” المرجلة” مواجهة قوى الشر ولأجل الخير والدفاع عن الضعيف والعاجز والطفل والمرأة .
” المرجلة ” شجاعة وقوة وعزّة وبطولة.
” المرجلة ” بحماية شرفك وعرضك وأرضك, ” المرجلة ” بالحق وليس بالباطل, وبالشهادة لأجل الوطن لا الشهادة على الوطن
“
السلام عليكم
أول زيارة لي بس لازمـ أسجل حضورة
حبيت المدونة جداا وحبيت هالصفحة بالذات
لان كلام من الواقع المرير اللي نعيشه…
المشكلة في مجتمعنا مايعرفون يفرقون بين الحرام وبين العادات والتقاليد
وفي نفس التايم أن مايعرفون يفرقون بين المرجلة والخشونة..
ليش ؟؟أنا بقولك ليش لان تفكيرهم مسكر ومايبون يضيعون وقت ويعصرون مخهم ويفكرون نحن ليش نتصرف بهالطريقة..
يتصرفون ع التعود والعادات اللي تعودوا عليها
أشكرك وسلمت اناملك الذهبية أخوي
أعجبني تفكيرك وصراحتك
هو نشوف هالكلام وهالتفكير ومن رجل بعد
لا هذي اهوون من الانوثه خخخخخخخخخخ
تسلم برهوم
wallahi ana ma3ajabni ha sitt bnoun la2ini 3am dawir 3ala kalimat ACH3ATA AGHBARA 3amalin y2oulouli ma fi itfi 3la ha sitt
:t
wisted:
[...] بعض العوائل توارثت الوصاخه والجلافه .. من كبيرهم الى صغيرهم مايعرفون شئ اسمه مزيل عرق,شامبو,صابون,بودرة ..بل وصل فيهم الحال انهم يظنون اللي يستخدمها ماهو رجال.. [...]
ترى ماهو من المرجله انك اذا بغيت تنادي زوجتك او امك او اختك في السوق تناديها بقولك لها ” هيه “ولا تصفر !! ياخي ماتبي تقول اسمها, قولها يا أم فلان.
شفتها اكثر من مرة
هههههههههههه حلو الموضوع مشكووووور ابراهيم