في آخر موضوع تكلمت عن تعريف المرجلة وانه يجب اعادة تعريفها لأن البعض صار عنده لبس في الموضوع ..
واليوم ودي نتكلم عن إعادة تعريف الأنوثة في هذا الوقت .. لأنه بدت تطلع لنا ظواهر جديده وكلها تحت مسمى الأنوثه والدلع والغنج ..
وبعضها بدت تؤثر سلباً على حياتنا الإجتماعية ..
——————————
- ترى لما الوحده “تتفاخر” بأنها ماتعرف تطبخ , وتلقاها تعيد هالموضوع في الرايحه والجايه وكأنه فخر , ترى هالشئ ابد ماله دخل بالانوثه والدلع .. وهذا يسمونه رفاله.
- ترى لما الوحده تنشر صورة لغرض معين على الفيس بوك, وتصور جزء من جسمها بالغلط ( ولاحظو بالغلط ) سواء كان البرطم ولا السيقان ولا اليد والأصابع اللي غاطتها بالمناكير و لا رموشها, وكل هذا تحت مسمى الصدفه .. هالشئ ماله دخل بالأنوثه أبد .. وهذا الشيئ يسمونه مصاخه والبعض يسميه دلع اللي مانب قايل
- ماهو لازم كل البنات يخافون من الحشرات , لأن الشئ هذا ماهو مرتبط بالأنوثه .. وما يذبحني الا اللي كانت يطلعون الخنافس من شعرها وهي صغيره ويوم كبرت صارت تصارخ كل ماشافت لها حشرة.
- التوفير في قماش العباية , وتفصيل عباية على المقاس , هذا يسمونه مشاركة ما لا يجب مشاركته مع الغير … وفيها من الصياعه وقلة الأدب الشئ الكثير ولا لها دخل بالأنوثه أبد أبد.
- التفاخر بعدم المقدرة على القيام بمسؤوليات البيت ماله أي دخل بالأنوثه والدلع … الا له علاقة مباشرة بالخمال وقل الدبرة.
- ماهو لازم الوحده اذا شافت لها مشهور انها تصارخ وتحط يدها على فمها وترتمي بحظنه ولا تصور معه … لأن هذا الشئ له اسم ثاني بس ما اقدر اقوله
- ماهو لازم الوحده تشرب عصير فراوله .. تراه مايزيد هرمون الأنوثه ولا ينقصه
- بقدرة قادر كل البنات كان عندهم باربي وهم صغار .. يعني وش فيها اذا قلتي لخوياتك انك كنتي تلعبين مع ” عنز ” وانتي صغيرة… أبد ماشفنا هايدي تنكرت من عنزها
- لما الوحده تقول بابي ومامي , خلاص بتصير شقراء وعيونها بتصير زرق؟ وش فيها لما الوحده تقول يبه ويمه؟ من يوم عرفت الدنيا وانا اقول يمه ويبه وهذا انا وش حلاتي
واللسته تطول .. واللي في باله شئ يقول
————-
أخواتي .. اتركوكم من الأنوثه الحديثه.. واللي ذكرتها في النقاط اللي فاتت .. فهي مصاخه ولا لها طعم .. ولا تصيرون امعه مع كل موضه .. لازم الوحده تحكم عقلها.. وتختار اللي يناسبها ويناسب دينها ومجتمعها.
والأنوثه من وجهة نظري هي الحياء والخجل المحمود والحفاظ على الطبيعه الأنثويه الناعمه والإبتعاد عن ما يعركها .. دون المبالغه في ذلك ..
ولا تقتدون بهالمغنيات .. فهم للعرض فقط .. وليس للمعايشه
يعني صعب انك تعيش مع وحده طول عمرها وهي ” أبي أمي أبي أبوي ”
ولتكن قدوتكم امهاتكم .. فهن الخير والبركه
=======
موضوع ذات صله :
نور الظلام : والله يابو مطلق ان كلامك منطقي … يمكن فترة النشوفه اللي مرينا فيها لها تأثير على نظرتي …
ويمكن من باب ان خدامتنا سوما بعد كانت ارجل من الرجوله .. فما تحتسب على انها انثى ..
فعلى قولتك 15 سنه كفيله بتحويل نظرتي ..
أخوي : أبرآهيم …
قسم قسمآت ضحكتني خآصتن …
(( بقدرة قادر كل البنات كان عندهم باربي وهم صغار .. يعني وش فيها اذا قلتي لخوياتك انك كنتي تلعبين مع ” عنز ” وانتي صغيرة… أبد ماشفنا هايدي تنكرت من عنزها))
هههههههههههههههههههه مآ فهمتهم يآ ابرآهيم هم يقصدون بآربي هذآ اسم الدلع للعنز يعني بدآل مآ تقول عنز تقول بآربي ألطف من عنز هههههههههههههه
___________
مشكور علىآ مآ خطته انآملك من إبدآع … وننتظر جديدك
توني اكتشف الأنوثة !
اخ ابراهيم
ابدعت الصراحة في طرح الموضوع
رسمت البسمة على الشفاه
وانتقدت بخفة وضحكة
وان شاء الله تعم الفائدة
من بعد اذنك
فاني سارفق وصلة للموضوع عندي في المدونة لموضوع قادم يمد بالصلة
اشكرك
هذولي الرجال ما يعرفون يطبخون وما صارو اناث
بس سالفة الي تسوي نفسها ما تعرف تطبخ على بالها انوثه
ذي ودك من سدحها تحت كفر دباب
هذي غييير حركات المصآااااله وثقالة الدم الي بالفيس بوك او بالمنتديات
تقولك ابصور لكم نخلتنا وما تدري الا جمبها رمش مرزوز ابفهم وش دخل نخلتكم برموشكم ؟
يارب لك الحمد
عاد سالفة مامي وبابي ودادي وخيو عمو وسواقو وشغالتو
يبيلهم من يعلقهم بالجسر المعلق عشان يفهمون ان هذا مو انوووثه هذي مصاله وثقالة دم وبثاره
بس صراحه على اني ضحكت على سالفة الباربي
<< والا كان لعبت معها خخخخخ
الا اني من صغري العب بباربي ولا ادري ان العنز ينلعب معها
مشكوووووور اخوي ابراهيم عالمدونه الروعه
صراحه طحت فيها بالصدف واضفتها الى مفضلتي
تحياااتي
السلاااااام عليكم
يالله ان تسلمه!
جعلك في الجنه يا ابراهيم
صدقت بكل اللي قلته وفكرتك واضحه مثل الشمس
وضحكتنا الله يضحك سنك
شفت الردود كثيره قعددت امالي نفسي ارد ما ارد ارد ما ارد
قلت زيادة الخير خيرين خل ارد واسجل حضور
بصراحة..التفاته جميلة منك اخوي ابراهيمـ..!
امس وانا بالسوق (انفجعت) من البنات..!تمشي وتدف..!
وغير اللي مرتزين عند الكوفي شوب..رحمت العيال والله..! الواحد يبي يرفع
الكوب لريقة..وينزله<<بلاه حايمتن تسبده من اللي مرتزين قدامه..
و اما عن موضوع الطبخ..فأنا احبه ولكن يا كثر ما اسوي حرايق بالبيت
و آه يا باربي ذي حكايتها حكاية..والعنز بعد اتعذبت معي والله..
وبالنسبة للـ(فيس بوك..والبال توك..والشات..الخ)..هذي على حسب الناس
اللي فيها..و أنا شخصياً لمن شفت البلاوي اللي تسير فيه..بطلت اشترك..!
صراحة..<<و اتكلم من جدة..
انعدم الذوق..و انا ما اقول كلامي من الهوا..لكن كل اللي جا من الرياض
وغيرها..يقول نفس الكلام..!(مع اني احب جدة والله)..لكن..صار الذوق معدوم
عند الأغلبية..<<مو كأن كلامي كثير؟ معليك..كذا الأخوات الصغار..لو فتحو
ما يصكون..! تسلم اخي ابراهيم عالموضوع..
اختك الصغيرة:MESHO~
ههههه
يعطيكـ العافيه أخ إبراهيم
أنا بصراحه أنبسط إذا أحد مدح طبخي
بس المشكله إني كنت ألعب باربي لما كنت صغيره
بس بعد كنت ألعب مراجيح و سياكل هههه
ولا مره صرت مثل هايدي ولعبت مع عنز للأسف
وأخاف من الحشرات بس مو كلها
وما كان عندي خنافس بشعري الحمد لله
يعني أنا من هالبنات اللي تتكلم عنهم؟
بتقولي ليه لاني متعاطفه معه رجله مكسوره وكلها كم يوم ومات
ومن ناحية الطبخ ترى ميته ع بال مايكون طبخي حلو بس سبحان الله مالي نفس في الطبيخ ومن ناحية باربي انا مير مااعرفها مااعرف الا هذيك العروسه اللي بدون عيون وخشم وفم اللي يسمونها اسلاميه اذكر اخوي اللي اصغر مني : ع طوول اول ماشافها جدعهاا باالارض خايف منها هع هع
وبيني وبينك لابغيت الحق حلو وجود اللي يتصنعون الانوثه ولا العربجيات المسترجلات هذولاء يحومون الكبد صدق استغفرالله يرعبوني اشكالهم
اخوي ابراهيــــــــــــــــــــم الف شكر ع موضوعك يسعدك ربي ومن اليوم مدونتك في مفضلتي لاضاق صدري زهمت عليها
ولا من الأنوثه إدعاء الريجيم طوااال السنه.
ولا من الأنوثه رفض العريس اللي أحواله بالباب.
ولا من الأنوثه رفض التعدد ..
على فكره من باب فضح المعسكر النسائي ..
البنت اللي تدعي عدم معرفة الطبخ تبي تقول للناس
إنها بنت عز وعندهم شغاله .عشان كذا ماتعرف تطبخ.
ليلى الحربي كانت هنا ..http://laylaalharbi.com/
[...] الجميع وخاصة الشباب وسيلة لعكس جزء منها؟ أو هو نوع من الأنوثة التي تحدث عنها ابراهيم القحطاني وإثباتها، لعكس [...]
الله يحفظك يا بو خليل
مشكور بو خليل
..
ممكن انا باكمل بشي قاهرني ورافع ضغطي
..
يا بنااات مو من الانوثه انك تغيرين معالم الحروف بدال ما تقول”طيب”
تلقاها تقول “تيب” على بالي دلع
..
ومثل ماقلت اللسته تطوول ..
بس عندي نصيحه حق البنات * البنت تظل انثى في نظر الذكر .. مهما كانت تصرفاتها ..
…
هههههههههههههههههههه
تعريق رائع انواع الضحك
تسلم برهوم
موضوع رائع ومازال موضوع الأنوثة جاري يعني الانوثه صعبه ماحد يفسرها
لكني نسيت طفولتي وشبابي
كنا نلعب طيرة وفتاحيه ورده سكاريه ورده
هههه
اما الالعاب الاخرى ممنوعه
كلامك صح
انا مايرفع ضغطي الا اذا قامت تتفاخر.. : لأ واااع انا اطبخ؟ وش خليت للشغاله..؟
واذا سألتها وش تعرفين تسوين.. قامت تقول لك كوفي وكابتشينو .. واذا صارت معجزه معاها صارت تعرف تسوي بيض
انا مااقول عيب البنت ماتعرف تطبخ..
اقول عيب البنت تتفاخر انها ماتعرف..
يقولون ان اول البنت تستحي اذا صارت ماتعرف تطبخ.. كأنه عيب عندهم
اوكي لاتعرفين تطبخين .. بس لا تتفاخرين..!
[...] [...]
الله الله عليك اخوي برهوم والله إنك جبتها رايت
وزيــــــــــن تسوي فيهم وش جاب الأنوثة للمصاخة وقلة الأدب شتان ما بين الأثنين
كل اللي قلته صدق حاصل وخصوصاً سالفة أبي أمي أبوي ريلي والله شيء غريب صاروا البنات يتكلمون بنفس الطريقة والأغرب نفس التون يعني تجيب لك طبقة صوت المذيعة كأنها متقمصة شخصيتها ( فايروس حشا مب موضة)
وبصراحة موضوعك رائع والردود والتفاعل أروووع وتعبت وأنا أقرا بس مستانسة وأضحك
وعن نفسي والله ناسية وش العابي بس باربي ما اذكرها التيل ممكن ويناشبنا أخوي عليها وكل شي يصير ممنوع اذا غلبناه في أي لعبه أنا وأختي وأذكر انطب معه هوشاته وهو الله يجيرك حمش ما يغشمر يعود علينا يضربنا ليه نفزع له
وخوافة موت من اي شي يزحف أو يطير وأموت على القطاوة وكان عندي وحدة زي القمر بس الجوي الأسري في بيتنا لا يصلح لها ناشبوها وعاقبوها ونكدوا عليها عيشتها وانحاشت ما تبي الا عمرها
هذه لمحة من طفولتي
ولا العنز يا حلوها ما عرفناها الا تو من قريب وحبيناها ( على قولة أهل جدة كتير كتير )فديت الشايب عنده معزا ومدلعهاآخر دلع….
والطبخ والله طبخي يجنن بس ما أطبخ الا بمزاج لأن عندنا خدم ومخبلينا صدق ومدلعينا رغماً عنا الله يديمهم على روسنا الماما والبابا ( حلوة أكيد الماما والبابا ترفع الضغط )
شكراً على المدونة الأكثر من رائعة أخوي ابراهيم وأنا توني مشتركة فيها ما صارلي كم يوم بس والله مستمتعة بمتابعتها و كمل على كذا الله يوفقك
احسك نفس اسلوب جدي انا شوف والله مو دلع جيبلي اي حشرة الا الصرصااااار عقدتي حتى لو كان ميت مااحب اشوف دعايات البيف باف جسمي يكش واخاف من البسس مرة بسة جات جنبي في استراحة وصرخت جدي عصب علي تعصيبة بس كملت صريخي في الخوف مااعرف احد وبخصوص بابا وماما انا صراحة اقول امي وابويا بس في ناس مو دلع طبيعة يقولون بابا وماما
بعدين اش فيها البنت اذا تدلعت بنت ياناس هذه فطرتها بلاش عقد
المرأءه هي الانوثه بكاملها